Guatemala rama thingtlang khuaa cheng, vaccine la duh lote chuan an khuaa Covid-19 laka invenna pek tuma kal nurse-te lo beiin darkar sarih chhung zet an hreng niin thuneituten an sawi.
Hmar lama Alta Verapaz province-a Maguilá khuaa cheng mi 500 chuang chuan kawngpui an dang a, nurse-te chuanna lirthei hi an lo suasam bawk.
Police nena an inbiak hnuah thawktu 11 chu chhuah an ni a, damdawi dose 50 chuang an tichhia.
Thuneitute chuan internet-a vaccine that lohna leh him lohna an hmuhte avangin khaw mite hian lak an duh lo niin an sawi.
Nurse-te hi tawngkam na tak tak bakah kut an thlak a. An lirthei ke chu an tihthepsak a, damdawi an dahna cool box-te pawh an tihchhiatsak niin health ministry chuan a sawi.
“Hetiang thil kan la tawn ngai loh avangin mak kan tiin min barakhaih hle a, keini chuan kan tih tur ti turin kan kal mai a ni,” tiin nurse pakhat chuan a sawi.
“Vawi tam vaccine chu a duh tana lak theih, a duh lo chu tihluihna awm lo a nih thu kan sawi pawhin hna thawh min phalsak duh lo,” a ti.
Tual chhung chanchinbute chuan an khuaa mi pakhatin vaccine hi a lo la tawh a, a hnu lawkah side effect a nei zui a, hei hian hriselna lamah nghawng tha lo a nei thei nia rinna a tidarh ta chiam niin an tar lang.
Mi thiamte chuan Covid vaccine-in side effect a neih langsar ber chu a chiu luhna lai vel na leh taksa sil a ni a. Mi thenkhat zinga khawsik, lu na, mitvai leh luak chhuak an awm bawk a; mahse, hengte hi pawh hi na tak a ni lo va, reilo te chauh awh a ni bawk.
Provincial health department director Gabriel Sandoval chuan vaccine hlau leh la duh lo hi an tawn fo tawh rualin tuna mi anga tharum nena che chu an vawi khat tawnna a ni tih a sawi.