Aizawl : HRD Board Vice Chairman, MLA L. Thangmawia’n “YMA hi Mizorama chanchin tha rahchhuahte zinga Mizo mipui ten vawiin thlenga kan tangkaipui berte zing ami a ni” a ti.
YMA, Zote ‘S’ branch Diamond Jubilee lawmna a hmanpuina ah he thu hi nimin kh- an L Thangmawia chuan a sawi a. Kum 1935 June ni 15-a sap missionary te kaihhruaia din YMA chuan a dintu ten Pathian hming lam chunga an din avang leh a din dan a dik avangin tun thlengin par a la chhuang zel niin a sawi.
Zote ‘S’ branch-in kum 60-na (Diamond Jubilee) an thleng chu a lawmpui thu sawiin, L Thangmawia chuan “YMA ropuina em em chu langsar lo rawngbawlna a kalpui thin vang a ni” a ti a. YMA rawngbawlnate chu mi te thik loh rawngbawlna, mi ten hre dawn miah lo mahsela midangte tana mahni hun leh tha pekna lam hlir a nih thu leh chu rawngbawlna chu mitin ten mahni chhungkua leh khawtlangah nasa zawka an kalpui chuan chhungkua, khawtlang leh ram hmel a tha zawnga a danglam tur thu a sawi.
L Thangmawia chuan “Mizo ram leh hnam kal zelna atan hnam tawng ngaihhlut a ngai” a ti a. Saptawng lam dik lo deuh nuihzat thin pawh sima mahni tawng – Mizo tawng – lam diklo leh ziak diklote nuihzat a hun tawh zawk thu a sawi a. “Mizo hnam tawng ngaihlu thar zual tura YMA pawhin tan a lak a tul” a ti.
Sap tawng pawh thiam a tul rualin pianpui tawng a nih loh avangin tlema nal lo deuhte pawh khawvelin a hrethiam em em zawk tih L Thangmawia chuan a sawi a. Zirna atan saptawng chu a pawimawh avangin thiam a ngai chauh zawk niin a sawi bawk.