Chelsea in tun season a Europe inelna lianah a vawikhat nan hnehna an chang a. UEFA Champions League Group E-ah pahnihnaah chho turin AC Milan 3-0 in an hneh.
Nilaini zana Stamford Bridge a inkhelah Premier League club in Serie A champion lakah hian chungnung zawk chan an chang tluan. Defender Wesley Fofana hmanga goal an khung hnuah second half-ah goal hnih an khung belh.
Graham Potter-a hnuaia inkhel Chelsea hi tun season-ah a vawikhatna atan inkhel a zawnin an chakna a ni a. Coach thar hnuaiah kawng dik an zawh tan.
Blues hi inkhel tan tir atang chance tha zawk siamtu niin Milan goal vengtu Ciprian Tatarusanu chuan Thiago Silva goal khung tur a dan hnuah minute 24-naah goal an khung a. Defender thar Fofana in a club tana goal hmasa ber a khung.
Fofana hi first half-ah inhliam avanga lak chhuak a ngai thung a. Coach Potter chuan inkhel zawhah a hliam chu a nat zawng hre lo mahse han chawlh deuh rihna tham a rih a hlauhthawn thu a sawi.
Second half tan hnuah minute 11 a kal lehin striker thar Pierre-Emerick Aubameyang chuan an goal hnihna a khung a. Minute ruk hnuah amah siamsaktu Reece James chuan an goal thumna a khung.
“Kan inkhelhdan leh kan khingpuite kan hlauh loh danah ka lawm hle. Kan result tha mahse khelmualah kan beih tak tak a ngaih chang a awm. Khatiang kan paltlang te kha a thatna lai a awm.”
“Chelsea leh AC Milan inkhel hi football match tha leh hmuhnawm a ni ziah a, hetianga kan tel thei hi thil lawmawm a ni. Kartawp lam kan thlir lehnghal ang.” tiin Potter chuan an chak hnuah a sawi.
Group E inkhel dangah FC Salzburg in penalty hmanga goal khungin 1-0 in Dinamo Zagreb an hneh a, group-ah hmahruaitu an nih phah.
Salzburg in second half-ah Sadegh Moharrami foul avangin penalty an hmu a. Hei hi Noah Okafor chuan Dominik Livakovic-a goal-ah a khung.