BJP National GS (Org) BL Santhosh-a’n “India ramah Mizoram chauh kristian tamna a ni lo” tiin, NE state danga kristian tamna state-ah te pawh BJP a sorkar vek tawh thu a sawi a. “BJP chu Kristian emaw, Hindu emaw Muslim emaw lam ni lovin mipui ta a ni” a ti.
BJP Mizoram worker te meeting a neihpuinaah he thu hi nimin khan BJP National GS (Org) BL Santhosh chuan a sawi a. BJP-a tel chu Kristian tan a him loh na a awm lo niin a sawi.
BL Santhosh chuan Prime Minister Narendra Modi chu rethei tak aṭanga bulṭana Prime Minister dinhmun a luah thei a nih thu sawiin, BJP worker te chu tunah rethei mahsela nakin lawkah Mizoram tan milian an la nih theih thu a hrilh a. “BJP-ah chuan corruption erawh a leng lova, mipui tana rawngbawl tura inpek hi kan hna pawimawh ber a ni,” a ti.
India hmarchhak chu Congress hunlaiin ngaihthah a ni ṭhin nia sawiin, BL Santhosh chuan Prime Minister Narendra Modi kaihhruaina hnuaiah erawh chuan hmasawnna nasa tak a thleng mek niin a sawi a. “Tunhmaa awm ngai lo mipui mamawh tam tak NE state ten an nei zel te hi a lawm awm hle a ni” a ti.
PM scheme hrang hrang kaltlangin India mipui tam takin malsawmna an dawng tawh nia sawiin, BL Santhosh chuan PM scheme tam tak chu Mizo mipuite pawhin chhawr tawhin, an chhawr mek bawk niin a sawi a. “Inkalpawhna kawng tha NHIDCL hnuaiah siam a ni a, Rel kawng hmun hrang hrangah sial a ni a, AIIMS damdawi in pawh dah belh a ni” a ti.
BL Santhosh chuan “Development party BJP hian kum 2023 ah chuan Mizoram mipui tan sorkarna kan siam ngei theih nan BJP member zawng zawng te theihtawp chhuah turin ka ngen a, Mizoram mipuite pawh Mizoramah development kan la hmuh ngai loh a lo thlen theih nan BJP lo support turin ka sawm a ni” a ti bawk.