Aizawl : National Highways and Infrastructure Development Corporation Limited-ten Kolasib district paltlanga four lane an laih turah compensation avanga harsatna la awm mek chungchang sawipuiin nimin khan Mizoram Journalists’ Association Kolasib District chuan District bawrhsap John LT Sanga chu a pisa-ah an kawm a, he hunah hian Competent Authority for Land Acquisition (CALA) Kolasib District Pu Lallawmawma pawh a tel.
Kolasib chanchinbu mite chuan bawrhsap hnenah hian kawng laih turah ram neitu diktakte chuan compensation la vat vat se an duhthu an thlen a, hemi tur hian hmalak sak turin DC hi an ngen a ni. Hemi lai hian Kolasib district-ah hmasawnna hrang hrang hna thawh a ni tawh thin a, hengah hian dik lo taka pawisa lak tum an awm thin thu leh chung mite chuan ram neitu dik takte harsatna an lo siam tawh thin thu te, Kolasib district mai ni lo, a Mizo hnam ang pawha mualphona a thlen tawh thin dan te sawiin chutiang thil chu tun four lane laih turah hian awm tawh lo se an duhthu an sawi a, hmalak sak turin bawrhsap hi an ngen a ni.
District bawrhsap pawhin Mizoram sorkarin district tinah land acquisition khawih turin Addl DC te chu CALA ah a ruat vek thu leh an hmalakna an enpui lutuk loh thu a sawi a, “Kolasib-ah pawh hei hi DC kan inrawlh loh chhan a ni,” a ti. Compensation sem a nih loh chungchangah harsatna hrang hrangte chu social media lamah pawh a darh avangin chanchinbu mite pawhin an hriat a rin thu a sawi a, “Compensation pek chhuah turah hian CALA leh NHIDCL ten joint account-in sum an vawng (operate) a, mahni thu-a lo pekchhuah ngawt theih a ni lo,” a ti.
Amaherawhchu tunhnaiah GAD meeting, Principal Secretary hova neih chuan buai a awm lohna hmunah chuan compensation hi pek tur niin a rel tawh a, hemi bawhzui hian buai nei lo mi 34 te account-ah compensation pawisa pawisa pawh an thunluh sak tawh tih a sawi. Bawrhsap chuan, “Compensation pek chungchangah hian NHIDCL lam an fimkhur em em a, nakina thil thleng palh thei hi an veng nasa. Forest department lamin Roadside Reserve Forest leh Deemed Forest-ah plantation a awm lo ngei a ni tih tihchianna mumal tak a awm loh chuan pawisa an pe chhuak ngam lo a ni,” a ti a, hei vang hian Roadside Reserve Forest leh Deem Forest chhungah Forest department lamin plantation an hauh chin hriat a ngai a, joint verification pawh neih a ni tih a sawi.
CALA atana sorkarin a ruat Pu Lallawmawma, Addl DC pawhin compensation an sem theih hrih loh chhan chu court case kal lai a awm vang bakah revenue department lamin CALA hnenah lehkha pe tih a sawi. A hnuah GAD meeting-in harsatna dang awm loh chuan sem tura a tih laiin sem theih a ni lova, dan angin public notice siam te, 3G notification te siam phawt a ni tih a sawi. “Mahse hemi lai hian NHIDCL lamin an pu te phalna lak hmasak a ngai tiin sem lo turin an rawn hriattir veleh,” a ti. Hei vang hian DC in district level-ah harsatna awm chingfel theih a nih leh nih loh hre turin meeting a ko a, meeting thu ang hian joint verification pawh kha neih a nih thu leh chumi lai karah chuan an awm mek tih a sawi.