Manchester City tan striker Erling Haaland chuan goal a khung chhunzawm zel a. UEFA Champions League-ah pawh engmah danglam chuang lovin FC Copenhagen lakah goal hnih khungin 5-0 in an chak.
Champions League Group G-ah City in Etihad Stadium-ah Danish mikhual an nei a. Hnehna chang tura an tih tur hlenchhuah an harsat lo. A tir atanga a tawp thlengin Copenhagen tan chet ngaihna a vang hle.
Goal khung turin Haaland-a’n minute 6 bak a mamawh lo. Ilkay Gundogan leh Joao Cancelo te chuan ball inpe in Haaland-a tan box-ah ball pet luh a ni a, ani in a bak zawng lo ti in chiang takin goal a khung.
Minute 32-naah Haaland bawkin goal khung lehin City in inkhel an dahtha a. Halftime hma in an goal thumna neiin David Khocholava chuan an lamah a ti lut.
Haaland hian tun season a a hattrick vawi li na siam theihna hun erawh a nei lova, a coach Pep Guardiola chuan hah chawlhna hun pe in halftime-ah a la chhuak.
City inkhel erawh a danglam chuang lo. Riyad Mahrez-a penalty khung bakah Julian Alvarez-a goal khung tur a siamsak hmangin goal an neih belh.
City hian khelh thum atangin point 9 an hmu tawh a, point hnih an hmuh belh leh chuan knockout stage an lut chiang tawh.
City coach Pep Guardiola chuan, “Erling Haaland hian chak a duh a, hattrick hi a ngaih pawimawh ber a ni lo. Player kan neihte an inkhelh vek a ngai. Inhliam avangin harsatna kan nei mek a, Kyle Walker te awm lo mahse kum 17 mi chauh a ni chungin Rico Lewis te ang pawh hian kan mamawh hna an thawk thei vek.” tiin a sawi.
Real tan Brazilian duo
Spanish champion in tun season UCL-ah match thum atangin a vawi thum nan hnehna an chang a. Shakhtar Donetsk lakah 2-1 in an chak.
Blancos hian inkhel hun hmasa lam thunun tha hle in Brazilian forward Rodrygo chuan goal hmahruai a khung a. Minute 28-naah Vinicius Junior chuan an goal hnihna a khung ve leh.
Shakhtar chuan Oleksandr Zubkov hmangin halftime hma in goal khat an khung ve hman a. Second half-ah si phuhr sut tumin nawr viau mahse Real an inhumhim thei hram.
Second half bikah Madrid tan goal vengtu Ukrainian keeper Andriy Lunin a rim a. Zubkov bakah Bogdan Mykhaylychenko te goal khung tur a dansak tha hle.
Madrid coach Carlo Ancelotti chuan, “Inkhelah kan chan a tha viau khan kan ngai a, kan thunun zawka ngaihna kan neih avangin second half-ah kan inthlahdah a, kan tlahniam.”
“Halftime-ah pawh hei hi kan sawi a, mahse hetianga han tlakhniam hi chu a thleng ve thei thin.” tiin an inkhel a thlirlet.
Messi te an chak zo lo
Paris Saint-Germain star Lionel Messi chuan record thar siam leh mahse a team in an hmahruaina an humhim thei lova. 1-1 in Benfica nen an inhnehtawk.
Estadio da Luz-ah Messi hian first half-ah goal mawi a khung a. Kylian Mbappe leh Neymar te nen inkawp a tlarhnung thiatin goal ‘cial’ a khung.
Champions League chanchin a khingpui hrang 40 laka goal khung thei hmasa ber a ni.
Mahse Benfica in an chhanglet har lo. Minute 41-naah Enzo Fernandez cross chu PSG defender Danilo-a’n an lamah a tilut palh.
PSG coach Christophe Galtier chuan Messi a khelh tluan tir loh chhan a sawifiah a, “A tawp lamah a hah avangin Messi khan chhuah a duh a, kha vang khan kan la chhuak.” a ti.