Kum kalta, 2021 chhung khan damdawi ina thi chhinchhiah 3,736 an awm a, thi zingah hian chawkawng leh a kaihhnawih natna vanga thi an tam ber.
Directorate of Economics & Statistics buatsaih Medical Certification of Causes of Death (MDDC) tih, tun hnaia an chhuah, ‘Medical Certification of Causes of Death (MCCD), Mizoram 2021’-a tar lan a nih danin nikum chhung khan medically certified deaths hi 3,736 an awm a, chung zinga mi 578, mipa 438 leh hmeichhia 140 chu chawkawng leh a kaihhnawih natna (deseases of digestive system) vanga nunna chân an ni.
Deseases of digestive system hian thin natna lam pawh a huam a, deseases of digestive system vanga nunna chânah hian a tam ber chu thin natna lam a ni a. Thin natna lam hian, zu, ruihhlo, hepatitis, cirrhosis te a huam a ni.
Lung leh thisenzam natna lam (deseases of circulatory system) pawh nunna latu lian a ni a, he natna vanga thi hi za zela 15.1 tlingin, hetah hian thisen sang a tel a; thisen sangin natna a thlen vanga nunna chân hi za zel a 4.7 a ni.
Natna chi thar, Covid-19-in nunna a la nual tawh a, 2001 chhunga boral, doctor-ten an boral chhan an ziah mi 3,736-te zinga 390, mipa 260 leh hmeichhia 130 chu Covid-19 vanga nunna chân an ni.
Cancer vanga nunna chân zat chu 375 an ni a, mipa 238 leh hmeichhia 137 niin, nunna chân zawng zawng zingah hian zaa 10 a tling a. Thawk lama harsatna, ‘deseases of respiratory system’ vangin mi 367, mipa 202 leh hmeichhia 165 ten nunna an chân a, 9.8% an ni.