Aizawl: October 12 thleng awh tur, Right To Information Week chu Larsap Hari Babu Kambhampati-a’n nimin khan Assembly Annexe Conference Hall-ah a hawng a, RTI chu sorkar khalh ngilna atan khua leh tuiten phur takin hmang zel se a duh thu a sawi.
Larsap chuan RTI Act hman a nih tan dante sawiin, mipui sorkara thuhneitute khalh ngilna atana a tangkaina leh langtlang sorkar a awm theihna atana a pawimawhna te pawh a sawi.
RTI chu tangkai taka hman theih a nih laiin hman sual theih a nih theih thu sawiin, “A tha lo zawng leh mi mal inbeihna atana hmang lo turin mipuite leh RTI hmangtute pawhin mawh an phur,” a ti a; RTI chu sorkar khalh ngilna atan khua leh tuiten phur takin hmang zel se a duh thu a sawi a ni.
Mizoram Information Commission-in hna a thawh that thu larsap chuan sawiin commission hmalakna leh a thawhpui GAD leh ICT te inpekna azarah Online RTI Application hman a ni ta chu hmasawnna a ni a, hei hian RTI diltute zinga office pan harsat deuhte tan awlsamna a siamsak mek tih sawiin, “Sum leh pai bakah hun hlu tak, RTI dilna atana sen ngai thin pawh a tiziaawm sawt dawn,” a ti.
Commission lam pawh hna thawk tha chhunzawm zel tura fuihin RTI chungchanga mipui zirtirna pawh uar zawka buatsaih chhunzawm zel turin a chah.
Chief Information Commission Lalnunmawia Chuaungo chuan thu sawiin, he inkhawma tel – DAA, SPIO leh SAPIO te chu tan la chhunzawm zel tura fuihin, Suo Motu disclosure under RTI Act-in a phut angin department tinte chu website nei tur leh website-ah mipui hriat tur thilte RTI hmanga zawh kher ngai lova tar lang vek tur an ni a, hei hi department tam zawkin an zawm tawh a; la tar lang lote pawh tar lang thuai tura hriattir an nih thu a sawi.
RTI Week hawnna inkhawmah hian RTI Activists ten thu an sawi bakah RTI Week denchhena college zirlai Slogan Writing Competition buatsaiha lawmman dawngtute hnenah lawmman hlan a ni bawk.