- Laldinsanga
Oct. 5, 2022 (Nilaini) ah Southern ZPM hruaitu thlanna neih a ni dawn a, hei hi ZPM Party lo din atanga Hruaitu thlanna neih hmasak berna a nih dawn avangin thil chhinchhiah tlak tak a ni.
ZPM General Hqtr lamah pawh hetiang taka inthlanna hi kum 2018 atang khan vawi khat mah neih ala ni ngai lo a, a ruata inruat zel ala nih avangin Vote neitute’n zalen taka hruaitu an thlanna hmasa ber a nih dawn avangin ZPM Party tan chuan thil huphurhawm tak leh chakawm tak a ni thei ve vein a rinawm. General Hqtr lam pawhin inthlanna neih hi puitlin ala nih theih loh laia Southern ZPM lamin hetianga inthlanna an nei tur hi an fakawm kan ti lo thei lo ang.
He hruaitu thlanna neih a nih dawn avang hian Sept. 28, 2022-ah khan Scrutiny pawh harsatna awm lo a neih a ni. President Post chuh turin Lalnuntluanga Sailo leh Lalrinpuii te Nomination file chu pawm a ni a. Vice President atanaa V. Malsawmtluanga Nomination file pawh pawm a ni a, amah chauh hi Vice President atana Nomination file awm a ni. Treasurer atan Lalramliana leh Lalrinchhana te Nomination file pawh pawm a ni. Tin, Executive Member atan seat 30 awmah mi 64 in hming an pe lut nain Scrutiny neih niah hian mi 5 te chu an inhnuk dawk leh thung. Tichuan Executive Member atana danin mi 30 neih tura a ruahmanah chuan mi 59 in hming an pek luh chu pawm a ni a, heng zingah hian mi 29 te chu Executive member an ni thei dawn lo tihna a ni.
Southern ZPM hian hruaitu a nei fuh thei lo kan ti dawn nge a nei fuh kan ti dawn zawk ni, hruaitu an neih tawhte hi duhkhawp lohna an nei lian viau tawh thin a, member te hi an fing lutuk zawk pawh a ni mai thei e. Tunah hruaitu thlanna neih turah pawh hian vote thlak thei mi 1200 vel awma hriat a ni a, an inkhawrh tha viau a nih chuan mi 800 chuangin vote an thlak turah ngai ila. Chutih lai chuan lang lo lamah inhrui pawhna boruak a lian viau a hriat a ni.
President atana Nomination file tute hi mi langsar ve ve an ni a, tun General Election hnuhnung berah khan lo ding tawh ve ve an ni bawk. An bial an vil hneh dun viau bawka hriat a ni a, tun tumah pawh hian vote a heu lem lo viau tura rin a ni. Pu Lalnuntluanga hi ZPM din tirha Treasurer lo ni tawh a ni a, chutiang bawkin Pi Lalrinpuii pawh Treasurer lo ni tawh leh tuna Vice President ni lai mek a ni bawk. Party chhung leh pawn lam atang chuan Hmeichhia nge Mipa ni ang tih chu thawm lian ber a ni.
Treasurer atana Nomination file tute hi mi inhlat tak leh mize in ang lo tak nia hriat a ni a, Pu Lalramliana hi Lunglei South vil mektu a ni a, Pu Lalrinchhana hi Bank Officer pensioner niin Southern ZPM ah hian Consultant a ni. Pu Lalramliana hi a tlin leh tlin lohin General Election a hril ngei tura ngaih a ni. Chutih lai chuan Pu Lalrinchhana hi inhnukdawk tura ngenna pawh a awm nia hriat a ni a, a chhan enge ni ang tih chu hriatthiam a har viau.
Sawi tawh angin Southern ZPM hian hruaitu an nei fuh hleithei lo viau thin a, Aizawl lam tan pawh a lu hai thlak viau thin awm e. Hmanni lawka GS pathum chawlh tir dan kha thil felhlel deuh a awm nge ni sawi rik ala ni fo a, hruaitu zingah kut sil tum viau pawh an awm nia hriat a ni. Chu chuan tun tumah hian boruak a nei angem tih chu result puan hunah ala hriat turah ngai zawk ila.
A tawp berah chuan tupawh tling sela Southern ZPM hi hnawk awm loin kal tawh sela hahdam takin kal tawh sela tih hi hmun hrang hranga ZPM Party tana thahnemngai tute authawm a ni a, chutiang tur chuan hruaitu tharte chuan kal tum ngei rawh se. Kan hma lawkah Municipal thar kan nei dawnin chumi atan chuan Councillor thlanna neih kan hmabak mai bawk a, chumi atan chuan ni khat pawh hahdam hman loa inbuatsaih nghal a ngaih avangin boruak dang rawn tlazep awm lo hram turin inbuatsaih sela kan duh bawk.
Tin, kum 2023 kan chuangkai mai dawn bawk a, General Election kan hmachhawn mai dawn bawk avangin hruaitu tharte mawhphurhna pawh a sang em em a, Lunglei leh Hnahthial District ah hian ZPM MLA Candidate in set that pawh a ngai ang a, in hlawhtlinpui phei chuan ZPM Party tan hian in hming a dai tawh ngai lo ang.