Congress President Lalsawta chuan Congress an sorkar chuan ram sum leh pai dinhmun siam tha tur chuan kalphung pangngai piah lama an kal a, tihdanglam a tul tih a sawi.
MPCC Elected Office Bearer-te Khawchhak Tlangdung Fan programme kal zelah nimin khan Bethel Community Hall, Champhai-ah vantlang inkhawm buatsaih a. Thusawitu Lalsawta chuan, “Congress kan sorkar a nih chuan kan ram economy siam thaa kuthnathawktute an dinchhuah theih nan thlai leh thei chi hrang hrang, vulh leh khawi chite a tam thei ang ber thar chhuah kan tum ang. Chutiang tur chuan kan kalphung pangngai piah lama kan kal a, kan tihdanglam a ngai,” a ti.
Lalsawta hian dinchhuah tuma tan la mek hnathawktute puihna turin Tang Puihna an siam tur thu leh, an thar chhuah hralhna thlengin an ngaihtuahpui vek dawn a, tan ngaihna hre tawh lote thlenga puih tur thu leh hnathawktute mamawh intawm siam nan phei chuan vaibelchhe tel sen an inhuam tih a sawi.
Congress party chu an danglam tawh a, rilru thar an pu tawh tih hi Mizoram mipuite an hmuhtir a ngai tih sawiin, “Kan minister hlui te, kan MLA hlui te, kan block leh unit hruaitute danglam rawh se tih lam a ni lo, mi dang nun en loin mahni theuh hi danglam i tum zawk ang u. Kan danglamna chu kan chhehvela miten an hmu ngei tur a ni bawk,” tiin, ram siam tha turin beiseina thar nei turin a chah.
Congress party an sorkar chuan Myanmar nena ramria insumdawn tawnnaah, tuna che hleithei loa awm mek sumdawngte leh mipui tam berte tan hian remruatna tha hmangin tun aia changtlung zawk, tangkai zawk leh lian zawka sumdawnna hi an kalpui dawn niin Lalsawta hian a sawi bawk.
MPCC Vice President Lal Thanzara pawhin thu sawiin, “Congress kan sorkar leh a nih chuan in grape tharchhuah hmanga in thil siam chhuahte hi kan mansak ve lo ang che u. In thar chhuahte hlawk zawka in hralh theih dan tur nasa takin kan ngaihtuah zawk ang. Tang puihna hmangin nuai tel atanga mamawh intawm siam nan vaibelchhe tel thlengin tanpuina kan pe dawn,” a ti.
“MNF hian Congress hnathawh thatte an tichhe nasa hle a. Pathianin min hruai tawh thin angin Congress party chu a chhe lai siam thatu kan ni zel zawk thin,” tia sawiin Lal Thanzara hian an President Lalsawta chu sorkar lo awm leh tur tana leiba tam tak hnutchhiahtu ni loin, hman zui tur Rs. vaibelchhe 700 chuang hnutchhiahtu ni zawkin, a kaihhruainain MNF kihhnawk zawng zawng hi an thian fai leh vek dawn tih a sawi.
Thusawitu dang, Zodintluanga Ralte, MLA & Treasurer, MPCC chuan Congress party hi sorkar leh turin an inpuah mek tih a sawi a. MNF chu Mizoram tichhetuah puhin, ram hruai reng tlak an nih loh thu a sawi a. “Mizoram hi siam that a ngai a, kan ram hi a rum mek a ni. Ram siam tha tur chuan sorkar hi a hausak a ngai. Sorkar hnathawk hlawh pawh pe hleithei lo tan ram siam that ngaihna a awm lo,” a ti a; Congress party chuan That loh theih lohna bawm siam tum President, sum leh pai enkawl thiam, eirukna a fihlim bawk si an neih ang hi party dangin an nei ve lo tih a sawi.