UEFA Europa League-ah Manchester United an mualpho leh teuh a, substitute bench atanga inkhel thlak danglam mamawhin Marcus Rashford leh Anthony Martial ten an chhanchhuak.
United hian Omonia Nicosia hmachhawnin goal an chhuah hmasak zawk hnuah 3-2 in hnehna an chang hram.
Cyprus a GSP Stadium ah Manchester United manager Erik ten Hag-a’n halftime zawhah England striker Marcus Rashford leh French forward Anthony Martial te a dah lut a. Minute 53-naah an si phurh sutna goal a khung.
Martial-a goal khung tur minute 63-naah a siamsak leh bawk a. Minute 84-naah Cristiano Ronaldo ball pet chu goal-ah Rashford hian lo khung leh bawkin United in second half goal thum an khung a. First half a an talbuai hnuah hnehna an chan theih phah.
Cypriot team hi first half tan tir lamah a bet zawkah an tang ngei a, goal ven an ngai ngun a, United in goal hlauhawm siam an tum ngawrh.
Mahse minute 34-naah rin loh takin hma an hruai. United che buaiin Jadon Sancho leh Tyrell Malacia te an mualpho a, an chet nawi atangin Karim Ansarifard chuan goal a khung.
United in goal thum a an chhanlet hnuah pawh an tlarhnung chu ngaihthatna tham ni turin a phui tawk ngai lo.
Minute 85-naah goal chhuah lehin Nikolas Panayiotou chuan Omonia Nicosia goal hnihna a khung.
United manager Ten Hag chuan, “Kan substitute ten danglamna an siam a, kha kha thil lawmawm a ni. Khatianga tih theih kha team chakna pakhat a ni.”
“Kan che a muang thin lutuk a, kan khingpuite tlarhnung chhaih buai harsa kan ti thin. Kha vang khan kan inthlak danglam a, a danglamna kan hmu nghal. Luke leh Marcus ten veilam an rawn tichak a, Anthony kha 2-1 a nihna chiah a ni bawk.” tiin a team a fak.
Gunners an la chak zel
Premier League lamah an che tha a, Europe huap inelnaah pawh an danglam chuang lova, Bodo/Glimt lakah 3-0 in hneh.
Emirates Stadium a inkhelah Gunners tan striker Eddie Nketiah chuan minute 23-naah goal hmahruai a khung a. Kieran Tierney goal ban pet per atang che rang berin a per chu a lo pet lut.
Minute li hnuah Fabio Vieira chuan Rob Holding goal khung tur siamsak leh bawkin second half tawp lamah Portuguese midfielder in an goal thumna a khung ve leh bawk.
Mikel Arteta pawlte hi inelna hrang hrangah a zawna match li an chakna a ni a. Europa League a an group-ah hmahruaitu an ni a, Premier League-ah pawh an sang ber mek.
First half-ah an chetthat avangin inrintawkna sang tak an nei tih a hmuh theih a. Arteta hian Tottenham hnehtu team atangin mi pariat thlak mahse an football khelh a buai chuang lo.
Arteta chuan, “Kan chak a lawmawm a, kan chak dan pawh a lungawithlak hle. Goal venhim bakah point ruk hmuh hi a tha.”
“Inkhel chik zawka thlir chuan player la inman tawk lo hmuh tur a awm. Tlakhniam lai kan nei a, inkhel kan thunun tha tawk lo. Player pariat kan thlak tih chu a hriat theih viau lai a awm.” a ti bawk.