Nilaini zan atang khan Deputy Commissioner Keerthi Jalli thupek angin Cachar district-a Bangladesh ramri-ah zan bikah zel curfew puan mek a ni a, ramri kâna helho chet velna awm thei nia hriat vang a ni.
Ramri hrulah hian Section 144 CrPC puan a ni a, punkhawm khap tlat a ni.
“Ni tlak atanga a tuk zing ni chhuah thleng, Cachar-a Indo-Bangladesh ramri atanga km khat huam chin zelah tumah chhuah phal a ni lo va. Tumah Surma luiah kal phal a ni lo va, India-in a thunun phak chin, Cachar district huamah ni tlak atanga a chhuah leh thleng curfew puan a ni,” tiin thuchhuahah chuan tar lan a ni.
Sorkarin ramria curfew a puan chhan hi helho chetvelna a awm dawn nia hriat a ni a, hengho hi dan leh thupek kenkawhna lam tibuai thei tur a nih avangin curfew hi puan a ni a. Hei bakah hian he district kaltlanga ran vulh inpek tawnna lam pawh a buai theih dawn avangin inven lawk a ni.
Curfew puan a nih chhung hian tumah sangha man tur leh thil dang ti tur pawhin Surma luia chhuah phal a ni lo va, Circle Officer, Katigorah-in lui hi a vil tlat dawn a ni.
Lirthei pawh chhuah phal a ni lo va, nawrh lirh, rickshaw leh inkalpawhna dang hrim hrim pawh hman theih a ni lo bawk a. Ni tin mamawh thil zawng zawng pawh zan lamah hi chuan engtin mah hralh leh lei phal a ni lo hrim hrim bawk.
Loh theih loh thila chet chhuah ngai an awm a nih chuan Circle Officer, Katigorah chuan phalna a pe thei dawn a; mahse, tual chhung thuneituin an mamawh dan a hriatpui ngei a ngai zel thung.
Ramria zan lama curfew puan hi thla hnih chhung huam phawt tura tih a ni.