Manipur sorkar chuan nimin khan an state chhunga khawlaia inpho thin mi 3,362 zet hnenah PM Street Vendors Atma Nirbhar Nidhi (PMSVA Nidhi) leh Pradhan Mantri Mudra Yojana kaltlangin loan an pe chhuak.
Minister leh MLA eng emaw zat telna inkhawmah loan hi a dawngtute hnenah pek chhuah a ni a, Imphal khawpuiah loan hi a kim thapin hlan an ni.
State sorkar hian khawlaia inzuar thinte hi coronavirus hri leng an tawrh nat em avangin chhan chhuah nan pawisa hi a puktir hlawm a ni.
“PMSVA Nidhi leh MUDRA hmanga khawlaia inpho thinte hnena minister leh MLA-te awm laia CM Secretariat complex-a hlan an ni hi a lawmawm a. Scheme hmang hian khawlaia inpho thin mi 5354 hnenah loan hi pek a ni dawn a, COVID-19 vanga harsatna tawkte puihna tur a ni,” tiin Manipur Chief Minister N.Biren Singh chuan a sawi.
Khawlaia inpho thinte hian hri leng avanga inkharkhip kalpui a nih chhung khan engmah sum lak luhna dang an nei lo va, tun thlengin an inpho theih loh hi tuarin chhungkaw tam tak chuan ei bar dinhmunah harsatna lian tak an la tawk chhunzawm reng a ni.