Aizawl : Convention Centre, Lungleiah nimin khan Lunglei Bawrhsap Kulothungan-a’n Right to Information Week a hawng.
Bawrhsap chuan mipui rorelna (democracy) sorkar leh RTI chu kalkawp tlat a nih thu sawiin, “sorkar hmalakna leh hnathawhte hriat chu khua leh tuite chanvo a ni”, a ti a. RTI act chu state dangte aiin Mizoramah hmang tangkai an tlem hle nia sawiin, a tangkai tur anga mipuiin an chhawr theihna tura inzirtirna lam kalpui uar tul a tih thu a sawi.
Suo moto disclosure ngaihpawimawh a tul thu sawiin, deptt. website-ah deptt. hmalaknate mipui hmuh theiha dah thin turin Deptt. hrang hrang te a chah a. Mizoram Information Commission (MIC)-ah zualkona a luh tlem thu leh SPIO ten hun tiam chhunga information an pekchhuah theih thin vang a nih thu a sawi.
RTI Act hi India ramah October ni 12, 2005 atanga hman tan niin, Mizoram bikah chuan June ni 29, 2006-ah MIC dinin, July ni 5, 2006 atangin hna a thawk tan a. Kumin July ni 1 khan online-a zawhna zawh theihna Mizoram RTI Online pawh hawn a ni.