Rural Development Minister Lalruatkima’n thingtlang mi rethei in sak tanpuina, Pradhan Mantri Awaas Yojana– Gramin (PMAY-G) hnuaiah chhungkaw 5,999-ten in an sa zo tawh niin a sawi.
He thu hi nimina East Lungdara Rurban Training Centre-cum-BDO Office hawnga, ;Aizawl thlai rate android application’ a tlangzarhnaah RD minister chuan a sawi a. Mizoramah PMAY-G tanpuina dawng thei chhungkaw 13,532 an awm thu sawiin, in sak tanpuina first installment pek tawh chhungkaw 10,532, second installment pek tawh chhungkaw 6,615, third installment pek tawh chhungkaw 6,373 leh fourth installment pek tawh chhungkaw 5,894 an nih thu a sawi.
Minister chuan chhungkaw 5,999-ten he scheme hnuaiah hian in an sa zo tawh nia sawiin, “La sa zo ve lo leh installment la dawng kim ve lote hnenah tanpuina installment hrang hrang pek mek zel a ni,” a ti a. Central atanga fund an hmuh tluan that theih chuan la dawng kim ve lote pawhin an dawn kim thuai theih nan sorkarin chak takin hma a la mek tih a sawi.
Nimina RD minister-in a hawn tak, Rurban Training Centre-cum-BDO Office hi Rs nuai 120 senga sak niin, Shyama Prasad Mukherji Rurban Mission (SPMRM) hnuaia Mizoram Technocrats Company, Tuikhuahtlang, Aizawlin a sak hna an thawk a, July khan an sa zo a ni.
RD minister-in a tlangzarh SPMRM, East Lungdar cluster te buatsaih Aizawl thlai rate awlsam taka hriat theihna tur mobile application hi Google playstore atanga download theih a ni.