West Ham United in UEFA Europa Conference League-ah a zawna vawi thum an chakna ni turin Belgian club Anderlecht an hneh a. An striker Gianluca Scamacca goal hmangin 1-0 in an chak.
Brussels a Lotto Park a inkhelah Hammers in an striker hi substitute bench-ah dahin chawlh hahdamna hun an pe a. Mahse second half a dah luh a nih hnuah chakna goal a pet lut mai hle.
David Moyes-a pawlte hian inkhel hun tam zawk thunun in goal hlauhawm vawi engemaw zat an insiam thei a. Premier League inkhel an hmachhawn hnuhnung bera an starting XI atangin mi pakua thlak mahse an football khelhin a tuar lo.
Tlarhmaah Michail Antonio leh Said Benrahma te inkhelhna hun siamsak an ni a. First half-ah Benrahma hian goal khung teuh hle in Jarrod Bowen-a siamsak chu goal chung chiahah a pet.
Lehlamah West Ham goalkeeper Alphonse Areola pawhin tih tur a nei ve thin thova. Yari Verschaeren-a ball pet kawh tak a dansak hnuah Anderlecht striker Fabio Silva tauh luh tur a dansak.
West Ham in a tawp lam minute 20 khel turin captain Declan Rice, midfielder Lucas Paqueta leh striker Scamacca te an dahlut a, an chakna goal luhna turah an inrawlh vek.
West Ham manager Moyes chuan, “Player inthlak kual thei turin squad kan nei chhah tawh a, zaninah pawh bench atanga lut ten inkhel an thlak danglam.” tiin a sawi.