Thosi seh atanga kai theih natna chi khat, dengue chu Mizoram chhungah a leng mek a, sorkarin a chhinchhiah chinah kuminah a vei hmuh chhuah 294 awm tawhin nikum kumtluana vei aiin 211-in an tam tawh zawk.
Health department hnuaia State Vector Borne Diseases Control Programme (SVBDCP) atanga thudawn danin kumin chhung hian Elisa khawl atangin dengue hri kai hmuh chhuah mi 294 an awm tawh a, an zinga 159-te chu Aizawl district-a chengte an ni.
Health department hotuten The Zozam Times an hrilh danin May thla vel khan Aizawl veng pakhatah dengue vei an pung chiam a, a hnu July thla vel atangin hmun hrang hrangah vei an awm chho ta zut a ni.
Kumin chhunga dengue vei hmuhchhuah tam ber thla chu September kha niin a vei hmuh chhuah chu 159 an ni a; kum 2021 chhunga vei hmuh chhuah zawng zawng aiin 76 zetin an tam.
Dengue hri leng mek hi a na lo chi a nih avangin he natna avanga nunna chân hi Mizoramah an la awm lo nia hriat a ni a. Kumin chhung hian dengue kai nia rinhlelh mi 2,034-te endik an ni tawh.
Health department-in dengue vei a chhinchhiahte hi Elisa khawla hmuhchhuahte chauh an ni a, mi mal damdawi ina rapid test hmanga vei hmuhchhuah pawh eng emaw zat an awm niin thudawn a ni bawk.
The Zozam Times-in Aizawl chhunga mi mal damdawi in thenkhat hotu a biakpawhte chuan August thla atang khan an damdawi ina admit zingah dengue vei an awm reng thin thu an sawi a, damlo admit atanga chhutin tam lo mah se, he natna vei hi admit thar an awm ve reng niin an sawi.
Dengue bakah hian thosi atanga kai theih tho, chikungunya pawh Mizoramah a leng mek a, kumin chhunga a kaite chu mi 24 an ni a, an zinga 22-te hi Lunglei district-a cheng an ni.
Dengue leh Zika virus hri kai darhtu, aides thosi-in a put darh tho, chikungunya hi Lunglei khawpui chhung bakah Haulawng leh Sekhum khuaahte a darh mek a ni.
Kum 2018 khan chikungunya hri kai mi 10 an awm a, kum 2020 khan mi 67-in an kai bawk a. Thihpui an la awm lo nia thudawn a ni bawk.