Rangvamuala Zofate Chhanchhuahna Camping neih tura luh tum mi 500 chuang an inziak lut tawh a, camping hi ruihhlo ngaite pual a ni lova, a duh apiang tan luh theihna tura buatsaih a nih thu camping organising committee-in an sawi.
Rampum huap Zofate Chhanchhuahna Camping hi September 17 atanga tan tura ruahman niin chhawng engzat nge an neih dawn tih an sawi lawk thei rih lo tih organising committee hruaitute chuan The Zozam Times an hrilh.
Camping neihna tur pandal chu September thla tawp lam atang khan sak tan a ni a, ni 13 chhung hnatlanga thawh a ni tawh.
The Zozam Times-in a tlawh laia lo dawngsawngtu, camping speaker tur, Frederick Laldindika, Bethel Ministry chuan ni khatah mi 200 vel pandal sain an hnatlang thin niin a sawi.
Frederick-a chuan sermon inkhawm pandal tur chu mi 1,500 vel leng tura an sak thu sawiin, camping-ah course khat-ah mi 1,000 vel lo dawngsawng thei tura an inbuatsaih thu a sawi a. Mipa leh hmeichhe awmna tur pandal pawh an sa zo thawkhat tawh niin a sawi.
Camping chu ruihhlo ngaite pual nia sawi awm chungchang zawhna chhangin Frederick-a chuan, “Camping hi ruihhlo ngai pual bik tur a ni lo va, ruihhlo ngai lote pawh, ‘Pathian hnathawh ka mamawh a ni,’ ti apiangte rawn luhna tur a ni,” a ti.
Frederick-a chuan camping an buatsaih turah sum senna tur a tam thu leh sum mamawhna a san thu sawiin, “Behchhan kan nei lo va, sum neih sa pawh kan nei lo,” a ti a, tawngtainain bul an tan a, Pathian awmpuina nasa tak dawngin kohhran, tlawmngai pawl leh mi mal hnen atangin tanpuina sum leh bungrua chi hrang hrang an dawn tawh thu a sawi.
Camping puihna an dawng zawng zawng chu a zat tak an sawi fak theih loh thu sawiin, “A zat tak hi sawi a har a, chutihrual chuan Rs nuai khat rawn thawh tawp te, silpaulin rawn thawhte an awm a, pandal sakna tur hmanraw hrang hrangte pawh thawhkhawm a tam hle,” a ti.
A tira ruahmanna an siam laia an beisei phak bakin ngaihhlut a hlawh nia sawiin, pandal sak hnatlanga telte pawh Aizawl khawpui chhung bakah khaw hrang hrang atangin lirthgei inhman tawmtea an awmna hmun pana an hnatlan thu a sawi a, hnatlang zingah kum 84 mite pawh an awm thu a sawi.
Ram pum huap Zofate Chhanchhuahna Camping an buatsaih tura lut turin mipuite an sawm a, camping hlawhtling tak an neih ngei theihna turin Zoram mipuite tawngtaipui turin an sawm bawk.
Rangvamual truck terminal-a Zofate Chhanchhuahna Camping neih tur atan hian organising committee awmin, chairman chu Rev Lalzuithanga a ni a, CYMA president pawh telin, YMA hian YMA branch tinte chu an huam chhung atanga camp lut turte ngaihven turin an ngen a ni.