Aizawl District Superintendent of Police-in Temple Corps, Aizawla sanapui chu zan dar 10 leh zing dar 6 inkarah tihrik a rem tawh loh thu hriattirna pe chhuak mah se Aizawl Temple sanapui chu darkar tin a rik leh theih ngei beisei a ni a; corps hruaituten hma an la mek.
Aizawl SP C Lalruaia chuan September 19, 2022 khan Temple Corps-a Crops Sergeant Major chu lehkha thawnin Temple sana darkar tina inkhawng ri thinin zan reiah bengchheng a siam thin tih hriat a nih thu leh hei hian Supreme Court rulling leh Noise Pollution (Regulation & Control) Rules, 2000 a kalh thu bakah he dan hnuaiah hian mi tinte thlamuang taka an mut hahdam theih nan zan dar 10 atanga zing dar 6 inkarah bengchheng siam khap a nih thu tar langin, danin a phut anga Temple sana chu zan dar 10 leh zing dar 6 inkarah chuan inkhawng ri tawh lo tura hma la turin a hriattir a ni.
Aizawl SP-in Temple sanapui zan dar 10 leh zing dar 6 inkara tiri tawh lo tura Temple Corps a hriattir hian sawi zui a hlawhin, dem a hlawh nasa hle a. Hemi chungchanga The Zozam Times zawhna chhangin Temple Corps hruaitute chuan Temple sanapui chu a hma angin darkar tin tihrîk a nih leh theih nan hma an la tih sawiin, Mizoram sorkar hotute hnenah ngenna an thlen tih an sawi a, sorkar atangin ziakin thu la dawng chiah lo mah se, an ngenna chu a hlawhtling dawn nia an hriat thu an sawi.
Temple Corps hruaitute chuan sanapui chu Mizoramin kum 1994-a chanchin tha thlen kum 100-na a lawm puala dah a nih thu sawiin, kohhran mipuiin an hlutin, an rilruah chuan a tla na em em a, kohhran dangte pawhin an hlutpui hle nia an hriat thu an sawi.
Sana a inkhawn rik loh changte pawhin kil tin atangin zawhna an dawng thin nia sawiin, zan dar 10 leh zing dar 6 inkara sanapui inkhawng ri tawh lo tura hriattir an ni chu an hrilhhai hle a, an beisei loh deuh thil tawngah an inngai tih an sawi a ni.
September 19, 2022-a lehkha an dawn hma thla thum kalta vel atangin Addl SP atangin tawngkain sanapui tiri lo tura ngenna chu an lo dawng tawh thin tih coprs hruaitute chuan sawiin, hemi avang hian a ri pawh a hma aiin an tihzawih phah tawh niin an sawi.
Aizawl Temple sanapui chu darkar tin ri leh thei dawn pawh ni se chei that a nih avangin engtikah nge an tihrik leh ang tih chiah sawi theih a nih loh thu Aizawl Temple Corps hruaitute chuan an sawi a. A rite pawh bengchheng siam lo deuh zawnga tihdanglam tum a nih thu an sawi bawk.