Premier League hmahruaitu Arsenal in inkhel pawimawhah Liverpool an hneh a. Tun season a club lian fiahna an hmachhawn tum thumnaah lawm zawkah tangin hmalam panin an kal chhunzawm.
Tun thla tira an hmelma Tottenham Hotspur an hneh hnuah Gunners in Premier League-ah Liverpool an hneh leh a. Emirates Stadium-ah 3-2 in an chak.
Pathianni zan inkhel hmuhnawmah duhthusam a bul tanin Gabriel Martinelli chuan second 58 chhungin goal a khung nghal a. Hei hi Liverpool in striker Darwin Nunez hmangin an sut.
First half tawp dawnah Bukayo Saka chuan Gunners hma a hruaipui leh a. Second half-ah Liverpool tan substitute Roberto Firmino chuan an si phurh a sut nawn.
First half a penalty beisei Liverpool in second half-ah penalty an chawi zawk a. Thiago Alcantara chuan Gabriel Jesus ti tlu in a spot kick chawi chu Saka in chakna goal ni turin a khung.
Arsenal boss Mikel Arteta chuan, “Hlauhawm tak taka min nawr theih dan an ngah a, player pawh an nei tha. Chuvangin hnehna chang turin kan chiai duh miah lova, huaisen taka kan tang tlat theih kha a fakawm hle.” tiin hnehna an chan hnuah a sawi zui.