Assam laili, Nagoan district-a hriselna lama thuneitute chuan lung in pahniha tang mek mi 88 zet chuan Human Immunodeficiency Virus (HIV) an bei tih an hmu chhuak tih an sawi.
HIV vei hmuh chhuah zinga a tam ber hi May thla vel atanga BJP kaihhruai sorkarin ruihhlo laka beihpui a thlaka mante an ni hlawm.
“September-ah ringawt khan mi tang zinga mipa 80 leh hmeichhia pariat chuan hri an kai tih hmuh a ni a, anmahni hi ruihhlo ti thin, inchiuna inhmantawm leh leina thin hmun inanga mite an ni,” tiin Nagaon Bhogeswari Phukanani Civil Hospital-a Superintendent Dr LC Nath chuan a sawi.
Nagaon-a HIV vei hmuh an nih hma lawk hian an thenawm, Marigaon district-ah thalai 27 chuan an vei tih hmuh a lo ni tawh bawk.
Assam State AIDS Control Society (ASACS)-in a thla hmasaa a chhinchhiahna a tihchhuahah chuan HIV postive hi mi 19,545 an nei mek tih an tar lang.
“Narcotic Drugs & Psychotropic Substances (NDPS) Act hmanga thubuai nei mek, an thubuai ngaihtuah laite a bika ASACS-in a endiknaah an kai tih hmuh a ni,” tiin Nagaon special jail Superintendent Arup Patangia chuan a sawi a, anmahni hi an thenawm, Hojai district-a mite an ni hlawm bawk.
“A tam ber hi kum 18 leh 38 inkar an ni a. Ruihhlo ngai an ni a, lung in chhungah chuan ruihhlo tih tur an neih tawh loh avangin man an nih hmaa kai an nih a rinawm,” a ti.
An zinga 45 hi special jail-a dah lai niin a dangte hi Nagaon central jail-a tang an ni a. Tan in thuneitute chuan a tam zawk hi bail-a chhuahtir lai an nih thu leh 32 chauh tan ina awm lai chu an nih thu an sawi bawk.