Karleh a an hmelma Real Madrid an hmachhawn hma in Barcelona in hnehna an chang a. Celta Vigo lakah 1-0 in an chak.
Pathianni zana La Liga inkhelah Barcelona hian Camp Nou-ah Celta Vigo an mikhual a. Midfielder chhuanvawr Pedri chuan goal khungin Blaugrana in hnehna an chang.
Barcelona hian point 22 hmu mekin khelh 8 atangin Real Madrid nen an point hmuh zat a inang mek a. Goal difference-ah an sang zawk. Club pahnihte hi Pathianni zanah Santiago Bernabeu-ah an inkhel ang.
League inkhelah a zawna vawi sarih an chakna a ni a. Mahni mualah Gavi leh Raphinha te an langsar a, goal hlauhawm siamtu an ni fo.
Celta lam Argentine goalkeeper Agustin Marchesin chuan Raphinha goal khung tur dang mahse minute 17-naah Pedri goal khung tur a dang thei lova. An defender Unai Nunez chuan Gavi ball pet luh chu pet chhuak thei lovin Spain midfielder in remchang a la.
Second half-ah erawh Celta Vigo an insiamtha a, Barca goalkeeper Marc-Andre ter Stegen chuan save tha a siam a ngai nual.
Barca coach Xavi Hernandez chuan, “Kar hnih kalta khan chak turin Lewandowski chungah kan innghat a, tunah Ter Stegen a ni ve thung. Marc hi goalkeeper tha bik a ni a, chak tur erawhin team a ngai a, goal khung a, goal venghim tur pawhin team bawk kan pawimawh.” tiin a sawi.