Aizawl : Champhai Bawrhsap James Lalrinchhana’n Inrinni khan Hmunhmeltha khua a tlawh a, hmunhma pawimawhte tlawhin, khawtlang hruaitute nen khawtlang mamawhte an sawiho a, khawtlang hruaitute hnenah khawtlang mamawh te a hlan nghal.
Bawrhsap chuan khawtlang mamawhte enfiaha zirchian a pawimawh thu leh khawtlang hruaitute nena sawihovin awmze thui tak a neih theih thu a sawi a. Khawtlang thatna tur ngaihtuaha inrawnkhawmna hun buatsaih chu lawmawm tiin, khawtlang hruaitute chu rualelna dik neia tan la turte, hmathlir thui tak neia khawtlang mamawh leh tulte ngaihtuah thin turtein a chah.
He khuaa AIR station chu hriatna leh thiamna kawnga mipui zirtirna pawimawh a nih thu sawiin, thawktute tan la zel turin a fuih bawk.
Bawrhsap chuan khawtlang hruaitute chu zirna dah pawimawh hmasaber tura chahin, faina atanga intan hriselna ngaipawimawh turte, ruihhlo laka thalaite fihlim theih nan sports hmanga chona siam tum tur tein a chah a. Khawtlang inrelbawlna kawnga mipawimawh tak takte chu khawtlang hamthatna hai chhuah leh inrelbawlna tha taka kalpui thei tura dan leh hraite ngaipawimawha zirchiang thin turin a fuih a. Sorkar thuchhuah leh khapna thupekte tha taka kengk- awha sorkar hmalaknate thlawp zel turin a chah.
Bawrhsap hian Hmunhmeltha khua leh a chhehvela hmunhma pawimawh – All India Radio Station, Health sub-centre, Govt. Middle School, MUP In, MHIP Run, infiamna hmunhma, Park leh Hmunhmeltha-Zote inkalpawhna kawng te a tlawh a ni.