Aizawl : Tuikum bialtu MLA, Mizoram state legislative assembly Dy. Speaker ni bawk Er. Lalrinawma’n a biala Sialhau khaw chawmtu tur Tui pump leh volleyball court thar nimin khan a hawng.
Sialhau khaw chawmtu tur Tui pump leh volleyball court thar hi MLA fund hmanga siam a ni a. Sialhau khaw chawm tur hian Tuivamit tui, khua atanga KM 1 vela hla a awm chu pump niin, khaw chhungah tuizem lian pahnih siam a ni a, heta tang hian sem darh niin, a fur a thala khaw- tlang mamawh phuhru thei tura ngaih a nih thu sorkar thuchhuah chuan a tarlang.
Er. Lalrinawma chuan Tui pump thar leh court thar hawn a ni ta chu Sialhau khawtlang tan hun hlimawm tak leh ni chhinchhiah tlak nia a hriat thu sawiin, “he ni kan hman theih chhan hi Sialhau mipuite inpekna avang leh thawhrimna vang a ni”, a ti.
Tuilakna thar chuan mipui nitin nunah awlsamna nasa zawk, hriselna leh thianghlimna lama hmasawnna duhawm zawk te a thlen dawn niin bialtu MLA chuan a sawi a. Volleyball court thar pawh thalai ten infiamna lama hma an sawn phahna tur a nih ngei a beisei thu a sawi.
Hmasawnna hrang hrang kalpui mek leh lo la awm zel turah te mipui leh sorkar thawhho that a pawimawh thu Er Lalrinawma chuan a sawi a. “Kan thawhhona a that phawt chuan hnathawh a thain a chak bik thin” a ti.
Bialtu MLA chuan “hmasawnna ruhrel kan neih ang ang te mipui ten mahni ta ang taka kan enkawl thiam a pawimawh” a ti a. Tui lakna leh volleyball court thar pawh a enkawl zui zelnaah khawtlang mipuiin mawhphurhna sang tak an nei tih an hriat a tul thu a sawi.
Infiamna lama tui mite tan eizawnna kawng zau tak a inhawng nia sawiin Lalrinawma chuan infiamna chu eizawnna tling a nih bakah hriselna atan pawh a tha tih a sawi a. Nunkawng diklo leh tha lo tak takte laka inthiarfihlima taksa leh rilru hrisel zawk neih nan volleyball court thar chu lo hmang turin thalaite chu a chah a ni.