- Ruata
Hero MotoCorp chuan electric scooter thar Vida V1 an tlangzarh ta a. He scooter thar hi variant hnih Rs. Nuai 1.45 man V1 Plus leh Rs. Nuai 1.59 man V1 Pro te a awm a ni.
Hero e-scooter thar, Vida V1 hi phase te tein an tlangzarh chho dawn a. A hmasa berin Bangalore, Delhi leh Jaipur-ah te an hralhchhuak dawn a, hemi hnu hian a tul ang zelin khawpui dangah pawh an tlangzarh zel dawn a nih hmel. Nimin atang khan Rs. 2499 chawiin a book tan theih a, he scooter thar leitute hnênah hian kumin December kar hnihna velah an pechhuak tan dawn a ni.
Hero Vida V1 hi a design lam chu mawlmang tak, mawi tak si a ni a, a rawng lamah chuan rawng pahnih inchawih, dual tone paint a nei a. LED headlamp a nei a, a hmalam apron-ah LED DRL awmin, LED turn indicator a nei bawk a ni. A hmalamah hian a smart display khuh tu windscreen tereuhte a awm a. He scooter hi a leituten an duh danin a design leh a rawng hi an tidanglam thei dawn a. LED taillight, alloy wheel dangdai leh mawi tak bakah a hnunga chuang te vawn tur grab rail te a awm bawk a ni.
He scooter hian 7-inch touchscreen display a nei a. Hei hian thil hrang hrang – speed, time, range, charging time, navigation leh thildangte a tarlang a ni. He electric scooter hian keyless control with follow-me function a nei a. Hei bakah hian two way throttle with Boost mode a nei a, hei hi a pick up ti tha tu niin hei bakah hian S.O.S alert function a nei bawk a ni.
Sawi tawh angin Vida V1 electric scooter hi variant hnih – V1 Pro leh V1 Plus te a awm a. Heng scooter pahnihte hi an top-speed 80kmph a ni a. Fast charging an support ve ve a, minute charge in km 1.2km zel tlan the7 ang a ni. V1 Pro hian charge full-in certified IDC range km 165 a tlan thei a, V1 Plus hian km 143 a tlan thei thung a. Scooter pahnihte hian 0 – 40kmph chu second 3 leh tlemah an thlan thei bawk.
Vida V1 electric scooter-ah te hian riding mode pathum – Eco, Ride leh Sport a awm a. Market lama a elpui tura ngaih te chu Ola S1, Bajaj Chetak, TVS iQube leh Ather 450X te a ni.