Police-te chuan India-a mihring pakua vel thattu, sakei hlauhawm tak chu Champaran, Bihar-ah an kap hlum.
‘Man-eater of Champaran’ tia an sawi hi police officer leh district thuneitu mi 200 rualin an veh a, officer thenkhat chu sai chunga chuangin an thawk chhuak.
Sakei pa hian thah a nih hma hian Valmiki Tiger Reserve chhehvela chengte a rikrap nasa hle.
India hi khawvela ramhnuaia tla sakei 70% chuang kawl mektu a ni.
Tiger reserve-ah sakei an pung zel a, a zauh zawng a pun ve si loh avangin buaina a awm zauh zauh.
Zawhte lian chi hian an ram neih an kham tawh loh avangin mihring chenna china luha an ran vulh eisak te leh mihring hial pawh beih an ching ta hle a ni.
Kum thuma upa, T-104 tia an sawi sakei thah tuma beihpui thlakna hi Bihar police-in kaihruaiin Sitaltola Baluwa khaw bula fu chinna hmunah an that a ni.
Chief Wildlife Warden Kumar Gupta chuan Times of India hnenah sakei hi ‘mihring tan a hlauhawm tak zet’ tih a sawi.
Valmiki Tiger Reserve Director Nesamani K chuan T-104 hi naute leh a nu a that tih thawm hriat a nih hnu lawk, Inrinni khan an vai thar leh a, an that ta tih a sawi.
Paltu Mahato chuan, “Zanah khaw pum kan mu ngai lo,” tiin Hindustan Times hnenah a sawi a. “Thenkhatin lung an vawm ri a, thenkhatin tin khawng riin sakeiin min hnaih loh nan kan awm reng a ni,” a ti.
Gupta chuan sakei hian ‘mihring a hlau lo reng reng’ niin a sawi a, an hual vek lai pawhin hlauvin a awm lo tih a sawi.
Team hnihah insiamin sai pahnih nen an thawk chhuak a, team dang chu a chhuah palh hlauhva lo chang tura dah an ni bawk.
T-104 hi Inrinni tlai dar 3:15 khan an kap hlum ta a ni.
Sorkarin kum 2019-a a chhinchhiahna a tihchhuahah chuan kum tin sakeiin mi 40 atanga 50 a tihlum ziah a ni.