Aizawl: Home Minister Lalchamliana’n bawhchhiatna ven leh mi sual chhui kawngah police officer-ten inzir thar zel an mamawh tih sawiin, tha thlah thiang an nih loh thu nimina Mizoram Police Service officer-te pual training a hawnnaah a sawi.
MPS-te puala buatsaih ni 5 chhung awh tur mid-career training programme hawnnaah hian home minister chuan khawvelin hma a sawn ang zelin dan bawhchhiatna (crime) ven leh misual chhui kawngah thil thar la hriat ngai loh te an tawng thar zel tih a sawi a, “Inzir thar zel a tul a ni,” a ti.
Dan leh thupek kenkawh kawngah leh thil dang dangah chona thar an hmachhawn reng thin tih sawiin, international border leh state ramri chungchangah tan mar pat a ngai tih a sawi bakah nitina office hna an thawh kawngah pawh zir thar tur a tam em em a, training course huam zau tak leh hawl kim tak an nei thei tur chu phurawm a tih thu a sawi.
Home minister chuan training-ah hian cyber crime chungchangte, mihring leh ruihhlova sumdawn chungchangte, human rights, nu leh naupang laka hleilenna, ruihhlo ngaite enkawl leh dan bawhchhiatna awm thei chi tinreng chungchang chipchiar taka zir tur a ni hian Mizoram police-te hnathawhna leh hmalakna a tichakin bung thar a kaipui ngei a rin thu sawiin, zirtirtu anmahni field-a a tha ber berten zirtirna an pe tur leh an inkawm tur hian rah tha a chhuah ngei ngei dawn tih a sawi bawk.
Mid-career training programme hi October 10-14 chhunga neih tur niin MPS-a direct-a lut, senior officer te an tel a, Mizoram University, police, sorkar official, NGO leh kawng hrang hranga thiamna bik neiten zirtirna an pe dawn a ni.
Nimina training hawn inkhawmah hian LR Dingliana Sailo, IPS, DIG (Trg.)-in inlawmna thu a sawi a, DGP Devesh Chandra Srivastva-a’n thuchah a sawi bawk a, Bhisham Singh, IPS, AIGP (Trg.), Course Co-ordinator ni bawkin lawmthu a sawi a ni.