Russia chuan Thawhtanni tuk atang khan mipui vei vel an tam lai takin Ukraine khawpui hrang hrang kapin civil mi an thih bakah thil a chhe nasa hle.
Tun tuma Russian-te chetna hi Crimea-a lei pawimawh tak beih a nih phuba an lakna nia ngai pawl an awm a. Ukraine President Volodymyr Zelensky chuan Russia hian Iranian drone an hmang niin a sawi.
Russia hian Ukraine ram chhungah missile 75 zet a kap lut tawh nia sawi a ni a, hei hian an khawpui ber, Kyiv leh chhim leh khawthlang lama khawpui liante a tum hlawm niin an sipai hotu chuan a sawi.
Tun tuma Russian an chet thar lehna hi indona a chhuah tirha khawpui ber lak an tum an thulh leh hnua Kyiv an beih nasat ber tum a ni.
President Zelenskiy chuan Russia-in an kahnaah hian mipui an inhloh nasa hle a, an rama thil pawimawh an bitum nasa niin a sawi bawk.
“Tukin chu a khirh hle mai, mi firfiakte nen kan indawr a. Missile tam tak leh Iranian Shahed an rawn kap lut a. Hmun hnih tum bik an nei a, ram chhunga energy siamna hmunpui an tum ber a ni,” tiin social media-a video-a thuchah a sawiah Zelensky-ahian a tar lang a. “An bitum pakhat zawk hi mihring an ni,” a ti bawk.
Khawthlang lama Lviv khawpui beihnaah electric hmunpui an kap chhia a, tui lum lakna a tawp bawk a, an bitum zingah energy hmun a tel tih Mayor Andriy Sadovyi chuan a sawi.
Kyiv-a kawngpui intawh khawmna lun ber laiah chuan ralthuamin a fuhna a kaw huau bawk a. Car a chhia a, in a chhe nasa bawk a, emergency worker-ten chin fel hna an thawk nghal.
Hetih lai hian Moldova chuan Thawhtanni khan Russian cruise missile-ten Ukraine an kahnaah hian an ram chung boruak an hmang tel niin an sawi a, Moscow palai hnenah insawi fiah turin an ti nghal.
“Black Sea-a Russian lawng atanga Ukraine lama kah chhuah cruise missile pathum chu Moldova chung boruakah a thlawk a ni,” tiin Foreign Minister Nicu Popescu chuan Twitter-ah a tar lang.
Hetianga nasa taka a beih thar thut hma ni chiah hian Moscow chuan Inrinnia Crimea leh Russia inkapawhna lei beituah Ukraine a puh a, he thilah hian mi pathum an ti.
“A titu, a ruahmantu leh tihtirtu hi Ukrainian secret services an ni,” tiin Russian President Vladimir Putin chuan a sawi a, ‘firfiaka chetna’ tiin a sawi bawk.
Russian hruaitu hian Thawhtanni tlai khan Security Council thutkhawm a ko nghal bawk niin Kremlin chuan tual chhung news agency-te a hrilh.