K Vanlalvena, NCC, MNF Gen. Hqrs chuan, “Sorkar hmaa ram hmangaih hlur a, sokar hnua chhung leh khat ringawt hmangaih hi Pathian leh mipui duh loh zawng a ni a, MNF chuan kan ti ve thiang lo,” a ti.
He thu hi Thawhtannia Mizo Hnam Run chhung inkhawmah K Vanlalvena, MP (RS) hian a sawi a. An sorkar hun chhungin hripuiin kum hnih chuang zet a nuai avangin an sorkar hmaa an intiam ang eng emaw zat tihhlawhtlin theih rih lohah mipui hriatthiam a dil a. Hetihlai hian an intiam anga sorkar zu zawrh an tihtawp nghal thu leh kut hnathawktute dawmkan nana an aupui nasa tak chu hripui vangin an duh angin kalpui mai thei lo mah se, tunah hian a tahtawlin an kalpui mek zel niin a sawi.
K Vanlalvena hian lalthutthlenga dahtu Pathian rawn chung zela an kal chuan an sorkar leh ngei dawn niin a sawi a. Pathian duh dan loa thil an tih chuan hnuh hniamin an awm dawn tih sawiin, “Kan work order, supply order leh hna lakahte hian tawngtaina nen Pathian rawn zel ila, kan sorkar leh em em ang. Kan hna inpek danahte hian a petuin chanvo neih ve phet lo tum hi Pathian duh loh zawng a ni bawk,” a ti.
Congress sorkar chu Mizo nationalism-ah ke pen lo leh hnam humhalhna kawngah hma a la meuh loa a puh a. ZPM pawh hi an hruaituten an sorkar tur thu puang dum dum mah se, sorkar leh kar loh chu puan vak vak aiin Pathian thu thu a nih zawk thu K Vanlalvena hian a sawi bawk.