Venezuela khawpui, Caracas chhim lama Las Tejerias khawpuiah nasa takin lei a min a, chenna in tam tak a tichhia.
Sik leh sa awm dan chi khat, La Niña avanga insiam ruah nasa tak sur avanga chhiatna thlengah hian mi 22 vel an thi a, mi dang 52 zet chin hriat lohvin an awm mek bawk.
Vice President Delcy Rodriguez chuan Pathianni khan chhiatna thlen nasatna ber hmun a tlawh a. Chhanchhuah hna thawktuten chin hriat lohte an la zawng mek zel tih a sawi.
President Nicolas Maduro chuan an dinhmun chu ‘a khirhin a hrehawm hle’ tih a sawi ve bawk.
Rikruma che chhuak chi mi 1,000 chuang zetin mi zawn leh chhan chhuah hna an thawk mek niin Deputy Civil Protection Minister Carlos Perez Ampueda chuan a sawi ve bawk.
Lei nasa taka min hi El Pato lui tuiin a kuang a luan liam hnua thleng niin lui tui lian hian chenna in leh dawr tam tak a len chhia a ni.
Tual chhung mi, kum 55 mi, Carmen Melendez-i chuan, “Khua kan chân a, Las Tejerias kan chân a ni,” tiin AFP hnenah a sawi.
Las Tejerias hi Caracas atanga km 67 vela hla niin kuminah hian Venezuela-a La Niña tuar na ber an ni.
La Niña hi khuarel a ni a, Pacific Ocean dai dukin Asia, Africa leh Latin America-a ruah tui tam tak a thlen phah thin a ni.