- Reuben Lalnunthara Hnamte
Aizawl Temple Corps sanapui inkhawng ri chu tunhnai 24th Sept.2022 atangin a reh ta ruih mai a, a khawharthlak hle mai. Zana han mut theihloh changte, manganna engemaw han tawh changte hian Temple sana han ri vung vung hian min hnem thin. Keini phei chu a hnaih berte zinga mi kan ni a. Kum tam tak a ri hi kan lo hre tawh a, sana pawh hi kan en ngai meuh lo, Temple sana hi kan lo ring lutuk a. A ri an reh takah chuan kan awm thiam mang ta lo; kan ti deuh hu mai hian kanin hri a, ngatinge tiin zawhna kan siam sek mai. Kan chhungkua mai a ni lo, awm thiam lo fe fe an lo tam ngang mai a. Temple sana a rik tak loh avanga mut harsat ta hial te pawh an lo awm nawk mai.
London kan kal khan London sanapui(Big ben) khu en turin kan kal a, sap ho chuan an han ngaihlu khawp mai a. London tiropuitu leh tihlutu ah an ngai a. Indopui laite khan khu London sana khuan London mipuite a hnem thinin an hria a kum 160 lai a ri tawh a, an sorkar pawhin a hlutin an roh em em a ni. Aizawl Temple sana pawh hi a dik tak chuan Aizawl tihlutu leh tiropuitu a nihna chen a awm a. Aizawl veng hrang hrang atangin a ri kan hre thei a, zan khawharte hi min hnemin sana nei lem lo tan pawh inngahna takah kan nei a, hetia an tawp ta rih mai hi a uihawm khawp mai.
Hetiang sanapui ang hi India ramah hian nei awm ve tak maw? Kei chuan Aizawl City ti Aizawl tu, London nena min thlunzawm tlattu nit e hian ka hre hial a. A ngaihtuah chhuaktu Aizawl Temple Corpste pawh an fakawm teh e. Kum 28 lai a ri kan lo hre tawh a, a lunglenthlak khawp mai. A lakna ringawt pawh hi a harsa teh a nia. 1994 kum khan Calcutta ti a koh a ni lai khan Aizawl Temple Corps ten Anglo Switch Watch Company atanga an lei a ni a. A phurh chhohna pawh hi a hautak hle mai. Kolkata atangin Guwahati thleng thlawhnaa phur chhovin, Guwahati atangin Truck motor lian hmanga Aizawl phurh thlen chhoh a ni a. Aizawla remkhawm thiam an awm loh avangin company lamin a remkhawm te pawh an rawn tihsak hial a ni.
Chuti khawpa aman a tam mai piah lam harsa taka phurh thlen chhoh chu a nih laiin, kum 28 zet a lo rik chhung hian harsatna awm lovin a ri chawl lovin a ri ta reng a. A sana a chhiat leh Battery down changtea an rik loh hlek te hian zawhna atam thei hle thin a ni. Chutiang khawpa mi tamber ngaihhlut leh inngahna a nih tawh lai a, tun hnaia tihtawp an ni ta mai hi a lunglenthlakin a khawharthlak hle mai. India ram state dang khawpui aia kan danglamna leh changkanna, mitinin kan intawm Aizawl Temple sana hi ngawi hlen mai tur a tan chuan a pamhmai lua a ni e.
Aizawl Temple Corps a upate sawi dan chuan “Temple sana hi Tun hma zawngin a rik loh chuan miin a khawhar thlak an ti a. Bengchheng ang zawngin sawiselna kan la dawng ngai lo. Khawl felhlel avangin siam that kan nei zeuh zeuh a, chutiangah chuan sawisel aiin khawhar thlak tia sawi an tam thin a, chutiang hunah chuan rang leh chak Sana siam that a ni thin,” an ti a ni. Chuti khawpa mite ngaihhlut chu Sorkar lam pawh an beng an tithlep mai lo torah ngai ila, reiloteah a ri leh bung bung turah ngai ang.