National Games 2022 neih mekah Thawhlehni khan Mizo boxer pahnihin semifinal an khel a, medal pahnih an hnek chhuak.
Malsawmtluanga’n final a lut a, silver emaw gold medal emaw la dawn tih a chiang. Lallawmawma erawh a vanduai zawkah a tang a, ani pawh hian bronze medal a la dawn tho.
Middleweight-ah Malsawmtluanga’n Goa boxer Pushpender Ashok Rathee a hmachhawn a, inhnek hmuhnawm takah unanimous decision (5-0) in a hneh. A tumpui apiang a sawp vek.
Electric Veng, Lunglei tlangval Mala hian first round-ah Sahil Aslambhai Nilgar chu unanimous decision (5-0) in a hneh a; Uttarkhand boxer Pankaj Kumar chu unanimous decision (5-0) bawkin a hneh.
Middleweight-ah Lallawmawma chu Services boxer Mohemmed Hussain Udin lakah a vanduai thung a, semifinal a thlen avang hian bronze medal chu a hlawh chhuak ta tho.
Tuipui boxer Lawmawma hian first round-ah Rajasthan boxer Jitendra Choudhary chu unanimous decision (5-0) in an hneh a, quarterfinal-ah Himachal Pradesh boxer Ashish Kumar chu split decision (3-2) in a hneh.
Mizoram boxer-te hi coach pahnih Lalfakzuala (SYS), Chanmari Lunglei leh B. Lalhriatpuii, Nursery ten an hruai a, boxer panga – mipa pathum leh hmeichhe pahnih an hruai.
National Games 2022-ah Mizoram hian medal pali a la dawn tih a chiang tawh. Lalhumhimi (-52kg) chuan Judo huangah gold medal a la a, inelna tir lamah weightlifter Zakhuma (61kg) chuan bronze medal a lo la tawh bawk.