Socialist hruaitu hlun, Mulayam Singh Yadav chu Thawhlehni khan Uttar Pradesh-a Etawah district-a an khua, Saifai-ah sorkar chawimawina Thawhlehni khan vui a ni ta.
India-a politics-a hruaitu lawk tak takin Yadav-a hun hnuhnung hi an hmanpui a. An zingah hian Uttar Pradesh Chief Minister Yogi Adityanath pawh telin an chhungkaw in atanga an hal ralna tur hmun thlengin mipui sang tel an intlar a ni.
Samajwadi Party dintu, Yadav-a hi Uttar Pradesh chief minister vawi thum a nih bakah union defence minister pawh a ni tawh a. Tha eng emaw zat chhung a damloh hnuah Thawhtanni tuk khan kum 82 mi niin Gurugram-ah a thi a ni.
A fapa, tuna SP chief ni mek leh chief minister hlui tho, Akhilesh Yadav chuan a hal ralna thing chheh chu a dep kai a ni.
Uttar Pradesh-a BJP kaihhruai sorkar chuan Yadav-a hi ni thum chhung sun turin a ti a ni.
A hun hnuhnungah hian sorkar laipui aiawhin Defence Minister Rajnath Singh chu a tel a. Telangana Chief Minister K Chandrasekhar Rao of leh Chhattisgarh Chief Minister Bhupesh Baghel te pawh an tel a. Anni hi party danga mite vek an ni.
An chenna in atanga hal ralna tur hmun panna kawngah amah thlawptute chuan, “Hruaitu duh tak hi a dam reng ang” tiin an au rual a ni.
Yadav-a vuinaah hian lemchan thiam lar, Amitabh Bachchan-a fapa, Abhishek pawh a tel a. Bachchan chhungkua nen hian tun hma atang tawha lo inkawmngeih tawh an ni.
Bihar deputy chief minister, RJD hruaitu, Tejashwi Yadav bakah Madhya Pradesh-a Congress hruaitu hlun, Kamal Nath leh Andhra Pradesh-a TDP chief N Chandrababu Naidu te an tel bawk.
UP deputy chief minister pahnih, Brajesh Pathak leh Keshav Prasad Maurya te pawhin Yadav-a hi zahna hnuhnung an lo hlan tawh a. Prime Minister Narendra Modi-a pawhin a ui thu a lo sawi tawh bawk.