Premier League kaithar Nottingham Forest in table mawngphah chhuahsan turin point an hmu a. Aston Villa lakah tlawm lo tura nasa taka beiin 1-1 in an inhnehtawk.
Nottinghamshire a The City Ground-ah Steve Cooper-a pawlte hian point an hmuh avangin 19-naah an awm a, Leicester City an lehpel. Lehlamah Villa pawh hi tlak hlauhawm atang an him bik lova, 16-naah awmin point thum chauhin relegation zone an hlat.
An club fans thawm ring tak hmaah Emmanuel Dennis hmangin Forest in goal an khung hmasa a. Minute 15-naah Morgan Gibbs-White-a freekick pet luh chu Villa tlarhnung inthlahdah avangin goal-ah Dennis hian a tauh lut.
Mahse minute sarih hnuah Ashley Young chuan Villa si phurh a sut a. Metre 23 a hla atangin goal-ah a pet lut. Kum 2011 hnua Villa tana goal a khung leh hmasak ber a ni a. Team pahnihten goal hlauhawm an siam hnem lohna inkhela chance tha tak tak an neih chhunah goal an khung.
Forest manager Steve Cooper chuan an midfielder manto Morgan Gibbs-White chu inkhel zawhah fakin, “Premier League a rim taka chhawr a nih vawikhatna a ni hial ang. Nikum lamah Sheffield-ah rinrawl a ni tawh. A la naupan deuh laiin a inhliam leh thin avangin rinrawl tak tak a ni thei lo thin.”
“Inelna sang boruakah a insiamrem chak hle a, rinrawl ni tura a hnathawhah kan lung a awi tak zet.” tiin a sawi zui.