Tata Yodha 4×4 LPS Pro Fight champion C Lalhruaitluanga leh pahnihna HC Lalramfela te hnenah an bialtu Deputy Chief Minister Tawnluia’n Rs 1,50,000 a hlan.
Thawhlehni a Chawnpui Veng a an chenna inah a bial chhung boxer pahnihte lawmpuina leh chawimawina hlanna hi an nei a. Super welterweight champion Hruaia kutah Rs 1,00,000 pein super lightweight final-a chak zo ta lo Ramfela’n Rs 50,000 a dawng ve thung.
Tuichang bialtu MLA chuan Mizoram infiamna huanga lian ber pawl leh huhang ngah em em, Zoram mipuiin an ngaihhlut LPS Pro Fight-ah a bial chhung Chawngtlai boxer pahnih hlawhtlinna a lawmpui tak zet tih a sawi.
“Champion thei Hruaia thawh rimna a chhuanawm hle a, Ramfela’n a tum tipuitling zo lo mahse a khel a hmuhnawm a, a chhuawnawm a, in kal zelna turah duhsakna ka hlan a che u,” a ti.
Mizo boxer langsar pahnihte hi Chawngtlai Welfare Committee, Aizawl leh Khawzawl Welfare, Aizawl hruaituten an tawiawm a. Bialtu MLA te chhungkaw chungah lawmthu an sawi bakah, pa nih tling, innghahna tlak a nihzia an sawi tel.