Aizawl: Mizoram Woodbased Industry Owners Association (MWIOA) ngenna bawhzuia Larsap Hari Babu Kambhampati-a’n Zokhawthar kaltlanga teak leh thingzai dang lakluh theihna tura ngenna Union Commerce & Industry Minister Dr Piyush Goyal hnena a thlen chu minister chuan chhangin heng thingte hi chu khuahkhirh bik zinga a tel loh thuin a sawi.
MWIOA hian June 21, 2022 khan Zokhawthar atanga teak leh thingzai dang lakluh kawnga harsatna an tawh thu ziakin larsap hnenah an thlen a, larsap chuan hei hi bawhzuisakin July 23 khan union commerce & industry minister hnenah an harsatna tawh sutkiansak tura ngenna a thlen ve leh a ni.
Union minister-in larsap ngenna a chhannaah chuan thing chi hnih – Article HS 44039918 tia chhinchhiah (rough wood of red sanders) leh HS 44039922 (rough wood of Sandalwood) te chu import policy hnuaiah lakluh khap a ni tih tar langin, a bak thingzai dang zawng leh thingzai atanga thil siamte chu khuahkhirhna awm lova Zokhawthar Land customs station kaltlanga lakluh theih a nih thu a tar lang.
Zokhawthar Land Customs Station chu sorkarin land customs station atana a puan tawh a nih thu pawh union minister-in larsap ngenna a chhannaah chuan tar lan a ni a. Heng thil kaihhnawia bawhzui tur a awm a nih chuan chak taka bawhzui a nih tur thu tar lan a ni bawk.