Aizawl: ZPM party Leader Lalduhoma’n, “Kan policy-ah hmasawnna ruangam lian tak tak kan nei a, chung zinga kan ngaih pawimawh em em chu power-a intodelh a ni,” a ti.
Nimina Neihdawn leh North Khawbung khuaa vantlang inkhawmah he thu hi Lalduhoma chuan sawiin, kum nga chhunga power-a intodelh thei turin hma an la dawn niin a sawi a. “Industry tenau deuh emaw, entrepreneurship lam emaw pawh ti dawn ila, power-a kan intodelh a ngai a ni,” tiin, mipuiin bul an tan ve theihna tura theihtawpa an puih tur thu leh Zoram mipuiin an mawmawh chu bultansaktu tur a nih thu a sawi.
Chhungkaw tinin tih theih zawng leh tui zawng an nei vek tih sawiin Lalduhoma chuan, “Bultannaah kan buai thin a, chu harsatna lak atanga chhanchhuak tur chuan ZPM hian policy tha tak, bana kaih (hand holding) kan nei a, hei hi a thlawna pawisa sem lam a ni lo va, puih tlak leh hlawhtlin tum tak tak ho hi kan enfiah ang a, kan pui mai dawn a ni,” a ti.
ZPM leader chuan, “Kan ram sik leh sa milin thlai kan ching ang a, a hlawhtlin ngei theihna tur chinah zel kalpui kan tum,” tiin, “Kan ram zim tê hi mumal taka enkawl hi a harsa lo, kan sik leh sa leh nungchate tha taka enkawl hi kan tum a ni,” a ti bawk.