Aizawl: ZPM Leader Lalduhoma’n ZPM party-in sorkarna an siam a nih chuan contract inpek dan an tihdanglam tur thu leh Mizo mipui pun theihna tura hma an lak tur thu a sawi.
Champhai Vengthar Community Hall-a ZPM Champhai South block Conference nimina neihah he thu hi Lalduhoma chuan a sawi a. “Boundary committee kan din ang a, chumiah chuan pary tin an tel ang a, NGO leh kohhran tin aiawh an tel dawn a, committee-in a rel angin ramri hi kan kalpui dawn,” a ti bawk.
Lalduhoma chuan, “Communisation kan uar dawn a, vantlang kutah thuneihna tam zawk kan pe dawn,” a ti a. “Mi tlem tê kuta thuneihna a awm hian thil a kal sual thin a; chuvangin, chutiang chu a bo theih nan vantlang mipui kutah thuneihna tam zawk kan pe dawn a ni,” a ti.
Sorkarin leiba a ngah thu sawiin ZPM-in sorkarna an chan chuan sum renchem tura hma an lak tur thu ZPM leader chuan a sawi a. Sorkar suma MLA car lei an tihtawp tur thu leh MLA-te hamthatna pawh a zahvea an tihtlem tur thu a sawi.
ZPM leader chuan, “Pathian leh mipui zara sorkarna kan siam thei a nih chuan department inlaichin tak takte minister pakhatin a enkawl dawn,” a ti a. Sorkar kalphung tihawlsam an tum thu leh sorkar dawr dan awlsam mipui tana an siam tur thu a sawi.
Lalduhoma chuan ZPM party chuan system thar an hmang dawn nia sawiin, an party inrelbawl dan hrim hrim pawh a danglam thu a sawi a. “Tunge thu ber, tiin min sawiselna an zawng thin a, keini erawh chu committee thuin kan kal a. Working president kan neite hi kan thatpuiin kan tangkaipui em em a. Kan pawl inawp danah hian tumah kan rawn lo va, tha kan tih angin kan kal mai a ni,” a ti bawk.