Bairabi atanga Sairang thleng rel kawng sial mek chu zaa 80 zawh tawh niin nakkum December thla khian hawn hman beisei a ni.
Nilaini khan chanchinbumi thenkhatin rel kawng sial mek an enfiah a. Anmahni lo dawngsawngtu, North-East Frontier Railways Consultant Raltawna chuan harsatna dang a awm loh chuan rel kawng an sial mek chu nakkum December thlaa an zawh fel hunah India Prime Minister Narendra Modi-a’n a hawn an beisei tih a sawi.
Raltawna hian tun dinhmunah Bairabi atanga Sairang rel kawng sial mekah harsatna an tawh, ram neitu hnena zangnadawmna avanga buaina an neih tawh pawh chin fel tawh niin, fur ruahtui tlak rei avanga hna an thawk chak theih loh chu an harsatna lian ber a ni rih a. Hei bak rel kawng sial kawngah mutan an nei tawh lo niin a sawi.
Rel kawng hi hman theiha hawn a nih veleh khualzin phur leh bungraw phur rel lo lut nghal tura beisei a nih thu sawiin Raltawna chuan, “Rel a service hunah chuan lirthei kawngpui pangngai zawha darkar tam tak sen thin chu rela khualzinte chuan darkar tlem zawk zinkawngah hun an hman tawh dawn avangin an chhawr tangkai a rinawm,” a ti.
Mizo thalaiten Railway Recruitment Boards (RRBs) exam lam an bawh loh avangin Bairabi atanga Sairang thleng rel a lo luh theih hunah pawh, thawktu zingah Mizo an tlem dawn tih a sawi bawk.
Bairabi leh tanga Sairang inkar rel kawng sial hi kum 2010-11 atanga hna tan niin, km 50.604-a thui a ni a. Sorkar laipuiin Rs. vaibelchhe 5,000 vel senna tura a ruahman a ni a. Tunah hian lei verh tur pawh zo fel vek tawh niin, he kawngah hian lei verh pangngai 32 a awm a, lei verh thui ber hi Bairabi bula mi, Tunnel No. 1 a ni a, km 1.8-a thui a ni.
Bairabi atanga Sairang inkarah hian rel station pali – Hortoki, Kawnpui, Mualkhang leh Sairang-ah te awm tura ruahman a ni a. Heng station leh quarter-te sak nan hian Rs. vaibelchhe 137.66 ruahman a ni bawk.
Rel kawng sial mek enfiahnaah hian MJA Gen. Hqrs President C Lalrambuatsaiha bakah member mi eng emaw zat an tel a ni.