Biate khawtlangin nimin khan a zawna khaw fai lawmman vawi nga an lak an lawm a, he hun hmanpuitu Deputy Chief Minister, UD&PA changtu ni bawk Tawnluia’n bawlhhlawh hman tangkai zui dan tur veia ngaih pawhmawh a tul thu a sawi.
Khaw fai lawmman dawn lawmna inkhawm, Zialung Hall-a neihah hian Tawnluia chuan Aizawl leh district khawpui dangah bawlhhlawh sawngbawlna hmun, solid waste management centre siam a nih thu sawiin chhungkuaah bawlhhlawh tawih thei leh thei lo thliar inzirtir a tul thu a sawi a. Bawlhhlawh chu hman tangkai theih dan tur ngaihtuaha vei leh ngaih pawimawh a tul thu a sawi.
Dy. CM-in Biate Town Faina Committee hnenah a zawna tum nga khaw fai lawmman an lak lawmpui nan Rs 1,00,000 leh lawmman an lak tar lanna thuziak a hlan a, committee-in veng, dawr, thingpui dawr fai leh inelna dang an buatsaih lawmman a sem.
Biate hian kum 2017 atanga 2021 thleng khaw fai inelnaa other urban towns category-ah lawmman 1-na bakah khaw fai ber lawmman an la a ni.