Aizawl: Congress thalaiin state healthcare scheme hnuaia damlote inenkawlna senso (bill) ba tam tak ching fel tura Mizoram sorkara legal representation an thehluh chungchangah chhanna an la dawng lo va, a tul a nih chuan mipui thlavang hauh tura high court thlenga PIL thehluh an tum.
Congress thalai President Dr Lalmalsawma’n nimin khan MPYCC office, Congress Bhavan-ah thuthar thehdarhtute kawmin, hemi kawnga an hmalaknate a hrilh a. Healthcare bill bate ching fel tura an ukil-te hmanga Mizoram sorkara legal representation an thehluh tawh chu tun thlengin chhanna an la hmu lo niin a sawi.
Dr Lalmalsawma chuan healthcare bill bate pe chhuak turin chief minister pawh an ngen tawh tih sawiin, sorkarin healthcare bill a batsak mipuite thlavang hauhna inkhawmte pawh an lo buatsaih tawh thu a sawi a. “Sorkar hian healthcare bill tang avanga mipuite harsatna chin fel thuai a tum lo a nih chuan a tul angin court sang zawkahte kal zela PIL thehluh thlenga hmalak kan tum,” a ti.
Congress thalai president chuan RTI hmanga healthcare bill tang zat an zawhna sorkarin a chhannaah August 26, 2022 thleng khan bill tang Rs. vaibelchhe 78 dawn a awm niin a sawi a. Healthcare bill hrek a nih avangin chhungkaw sing telten harsatna nasa tak an tawk mek nia sawiin, puk chawpa damdawi ina inenkawl, an inenkawlna bill an lak leh theih lawk loh avanga an ro neih ang angte tiral tate pawh an awm niin a sawi.
Mizoram sorkar chu mipuite a theih ang anga sawr fu-ah puhin, healthcare bill ba tam avanga mipui harsatna sutkian a nih theihna tura Congress thalaiin hma an lak zel tur thu an president chuan a sawi bawk.