Khawvela politician hlun ber pawl ni tawh, Mahathir Mohamad-a chuan kum 97 mi zet ni tawh chungin Malaysia-a parliament inthlanpui neih turah chuh leh a tum.
Mahathir-a hi prime minister vawi hnih a ni tawh a, a hmasa zawkah phei chuan kum 22 zet a ni a. Kum 2018 khan kum 92 a nih laiin ruat nawn leh a ni bawk.
Kumin kum tirah khan a lung lam tha lo avangin damdawi inah a awm reng tawh a; mahse, tunah chuan a seat chuh leh turin a hriselna a tha tih a sawi.
A tanrualpuite nen an chak a nih chuan prime minister a ni dawn em tih erawh a la sawi lo.
“Prime minister tur kan la sawi lo va, prime minister candidate chu kan chak hnuah chauh a ni ang,” tiin Mahathir-a chuan thuthar lakhawmtute hnenah a sawi a ni.
Malaysia-ah hian Thawhtanni khan parliament thiah niin inthlanpui neih a ni dawn a, khawvela sum tihchingpenna thubuai lian ber pawl, 1MDB an tih mai hnua hun rei tak sorkar ngialnghet lo tak an neih chu inthlan zawh atang hian a tawp theih beisei a ni.
Mahathir-a hi kum 1964 khan a vawi khat nan parliament member a ni tan a. Kum 1980 chho atanga eibara an ram thanga hmasawnna nasa tak thlentua ngaih a ni.
Kum 2018 khan chawlin prime minister hlui, Najib Razak-a chuan dollar maktaduai tel ei ruah a puh.
A hmelma ni thin, Anwar Ibrahim-a puihna azarah Mahathir-a hi kir lehin prime minister a ni leh a, Najib-a chu sum chheprelh leh thuneihna hmang suala puhin lung inah a khung zui.
A hnu lawkah a thawhpuite nen an intithiam lo va, February, 2020 khan Mahathir-a hi paih thlak a ni leh ta a ni.
Kum 97 mi hi lung lam sawiselna nei fo a ni a, heart attack nei tawhin bypass surgery pawh tihsak nual a ni tawh a. Thla hmasa khan damdawi in atang a chhuak chauh a ni.