Coach thar nei Chelsea in boruak thar an hip hnua an chetthat an chhunzawm a. AC Milan lakah goal hnih khungin 2-0 in an chak.
San Siro a UEFA Champions League Group E inkhelah Italy champion lai in an khingpuite defender hlui Fikayo Tomori chu red card avangin inkhel tan tir lamah an chan a. Tlem zawka hun rei tak an khelh chu an tuar hle.
English defender hian penalty area chhungah Mason Mount chu ti tlu in penalty a chawi a. Jorginho-a’n Chelsea goal hmahruai a khung.
Blues tan striker lakluh thar Pierre-Emerick Aubameyang chuan an goal hnihna a khung chhunzawm a. A lo khelh tawhna thin club lakah minute 34-naah goal a khung.
Chelsea chak zanah an lawm erawh a kim lo. England leh an right-back rinrawl Reece James chu inhliam avangin lakchhuah a ngai a. A hliam hi a nat zawng hriat ni lo mahse World Cup khel tur England ngaihventute lam thlengin an hlauthawng hle.
Potter-a hnuaiah Chelsea in tlawm an la nei lova. A hnuaia match nga an khelhna niin vawi li an chakna a ni.
Group E-ah Blues in hma an hruai a, mahse tumah fal bik awm lovin Salzburg aiin point khatin an sang a. Milan leh Dinamo Zagreb ten point li ve ve an hmu tawh.
Chelsea manager Graham Potter chuan, “He stadium pantu tan hnehna chan hi thil awlsam tak a ni lo. Player ten fak an phu hle. Tlem zawk ni chunga an khelh ngai kha kan vanneihna a ni a. A chang hi chuan hetiang hi a thleng thin, kan tana thil a awlsam tum hi a awm ve thin.” tiin a sawi.
Blancos an tling
Champion lai in tlawm lo turin huntawp dawnah goal khung an mamawh a. Mahse an tana point khat hlu tak hmuh phahin Shakhtar Donetsk nen 1-1 in an inhnehtawk.
He inkhel hi Ukrainian club in mahni muala an hman Poland khawpui Warsaw a Stadion Wojska Polskiego-ah nghah a ni a. Ukrainian club in chak hnaih hman hle mahse Real Madrid defender Antonio Rudiger chuan an si phurh sutna goal a tauh lut.
Second half tan tirah Shakhtar tan Bogdan Mykhaylychenko siamsak chu penalty area chhunga vengtu nei lova awm Oleksandr Zubkov chuan goal-ah a khung.
Real Madrid hian RB Leizpig laka hnehna an chang leh a nih chuan an group ah hmahruaitu an ni chiang tawh ang.
Real coach Carlo Ancelotti, “Kan khelchhia a, mahse hetiang a thlen chang hi a awm lo thei lo. First half-ah inkhel kan thunun a, mahse goal kan chhuah chiah khan kan inkhel a buai nghal a. Kan team balance tha kha kan hloh.” tiin an inkhel a thlirlet.
PSG in chance bawhpelh
French champion Paris St-Germain in round of 16 luh chian theihna hun an neih an chhawr tangkai lova. An mualah Benfica nen 1-1 in an inhnehtawk.
Parc des Princes-ah Benfica lakah French forward club chhuahsan duh nia sawi mek Kylian Mbappe chuan penalty atangin goal a khung a. Mahse Benfica in second half-ah penalty hmu ve in Marco Verratti chuan Rafa Silva laka foul in spot-kick a chawi a. Joao Mario-a’n an si phurh sut nan goal-ah a chantir.
PSG hian khelh hnih la hmabakin point 8 an hmu tawh a. Inkhel dangah Maccabi Haifa kutah Juventus an mualpho avangin Benfica nen an tan tlinna ‘chance’ a la tha hle.