Aizawl : Sorkar laipuia Tribal Affairs Mi- nistry sum Rs. nuai 130 senga sak Champhai Observation Home, Champhai Zote ami chu nimin khan Social Welfare & Tribal Affairs Minister Dr. K. Beichhua-a’n a hawng.
Naupang, kumtlinglo dan bawhchiatnaa inhnamhnawihte enkawlna hmun Champhai Observation Ho- me hi CFH Consultancy Services, Republic Veng, Aizawl-in February, 2019 khan sa tanin, November, 2021 khan an zo fel a ni.
Champhai Observation Home hi March, 2015-ah din tan niin, thawktu Superintendent, Accountant, Case Worker, House Father, House Mother, Medical, Cook bakah Security Guard pathum an awm a. Naupang 25 thleng awm theihna niin, naupang 6 an awm mek.
Sorkar thuchhuahin a tarlan danin naupangte hi Juvenile Justice Board (JJB)-in an chungthu a ngaihtuah thin a, thla 4 aia rei an awm theih loh avangin Special home, CWC leh LIFECODE ah te sawnchhuah thin an ni. Din a nih atanga case lut tawh zawng zawng 268 niin, naupang hmundanga sawnchhuah tawh zawng zawng 34 an ni.
Home a lut, bail-a chhuahtir tawh 47 an ni a, chhuah pangngaia chhuah zalen naupang 181 an awm tawh. Naupangte hi school-a an kal a rem loh avangin non-formal education pek an ni a. Bible study, computer class, health education leh regular counseling-te neihpui thin an ni bawk.
Nimin vek khan AH&Vety Minister ni bawk Dr K Beichhua chuan Champhai Ruantlanga Live Animal Market thar a hawng a. Live Animal Market hi Rs. nuai 260.84 (NABARD Rural Infrastructure development fund-XXII (RIDF-XXII) atanga loan Rs. nuai 246.50 leh state sum Rs. nuai 14.34) te hmanga phase hnih 2017-2018, 2018-2019 a sak a ni a. Ran lian chawlh hahdamna tur in 2, Ran te zawkte chawlh hahdamna tur in 1, laboratory, thawktu quarters, tuilakna, inkalpawhna kawng leh tuldangte a keng tel.