Russia chuan Inrinnia an ram leh Crimea inkalpawhna leia thil puak an chhuinaah mi pariat an man tawh tih an puang.
An rama FSB security service chuan an mi man panga chu Russian an ni a, a dangte hi Ukrainian leh Armenian an ni tih an sawi.
Kremlin hian Kyiv chu he lei beihnaa a mawhphurtuah a puh a, Ukrainian thuneitu pakhat erawh chuan Russia-in a chhuina chu ‘engmah lo mai’ a nih thu a sawi.
Inrinnia Crimea Bridge beih leh tihchhiat khan Russian President Vladimir Putin-a tan chuan na tak a ni a, an ramin Crimea a awp atanga kum li, kum 2018 khan lei hi a hawng a ni.
President Putin-a chuan lei beihna chu ‘firfiaka chetna’ tia sawiin, Russia sorkar thil siam pawimawh tihchhiat tumna a nih thu a sawi.
FSB thuneitute chuan thil tihpuah kha ‘Ukrainian Ministry of Defence hnuaia Main Intelligence Directorate ruahman a ni a, an hotupa chu Kyrylo Budanov niin a thawhpuite leh an agent-te nen ruahmanna an siam’ niin an sawi.
Puak thei khan plastic film zial karah an dah a, Ukrainian lawngchawlhna, Odesa atangin tuipuiah Bulgaria thlenpui a ni a, Georgia pan lehin lorry hmangin Armenia kaltlangin Russia ram an luhpui ta niin an sawi.
Directorate thupuangtu, Andriy Yusov erawh chuan Russian-ten an puhna chu engmah dik a awm lo niin a sawi ve thung.
“FSB leh Russia-a Investigative Committee-in an chhuina chu engmah a ni lo,” tiin Ukrainian chanchinbute hnenah a sawi a. “Putin-a sorkarna hnuaiah thil lem phuahchawp a ni thin a, an thil sawi hnuhnung ber pawh hi sawi zui ve vak tur kan nei lo,” a ti a ni.