Aizawl : Samagra Shiksha Mizoram leh Sports association 5 – Mizoram Boxing Association, Mizoram Badminton Association, Mizoram Football Association, Mizoram Weightlifting Association leh Hockey Mizoram ten thawhhona thuthlung an ziak.
He thawhhona thuthlungah hian Samagra Shiksha Mizoramin thla ruk chhung kalpui tur Grassroots level sports development programme (GSDP) atan Mizoram hmun hrang hrangah centre 40 a din dawn a. District tinah District level management board din a ni anga, board hian District sports association te rawn chungin trainer leh asst. trainer te a la ang.
Centre nghahchhan school tur sorkar sikul chu Dist level management board-in an thlang ang. Centre tinah naupang 30 zel an awm ang a, an zingah hmeichhia 5 aia tlem lo an tel tur a ni a. He programme-in a tinzawn chu Elementary school naupang kum 6-14 inkar sorkar sikul naupang te an ni.
Naupangte training na tur bungrua chu State project office atangin ngaihtuah a ni dawn a. Naupang zirna tibahlahlo zawngin kar khatah vawi hnih emaw vawi thum emaw training neihpui țhin an ni ang. Training-na atana mamawh bungruate chu Samagra Shiksha Mizoramin a tum dawn niin sorkar thuchhuah chuan a tarlang bawk.