Manchester City in tun season UEFA Champions League-ah a vawikhatna atan point an hloh a. Denmark-ah zin chhuakin FC Copenhagen nen goal inpe lovin an inhnehtawk.
Thawhlehni zana Parken Stadium a inkhelah Manchester City hian lakluh thar Sergio Gomez chu red card avangin darkar chanve chauh an khel hman tihin an chan a. Darkar khat chhung tlem zawk ni chungin an khel.
Premier League champion lai hian inkhel thunun an harsat phah a. Tun season a vawikhatna atan goal an khung thei lo. An striker chhuanvawr Erling Haaland chu chawlh hahdamna hun pe in inkhelah an dah lut lo tluan bawk.
A goal thei lo
City hian minute 11-naah goal mawi an khung a. Spanish midfielder Rodri chuan metre 23 atangin mawi takin a pet lut. Mahse VAR hmanga goal ennawn leh a nih hnuah Riyad Mahrez chuan goal luh hma a ball a lo khawih avangin pawm a ni lo.
First half inkhelah thil thleng a tam. Minute 25-naah Nicolai Boilesen handball avangin Copenhagen in penalty an chawi. City penalty pet thin Mahrez-a’n a pet goal lo zui. Mualneitu goalkeeper Kamil Grabara chuan a penalty pet a dansak a. Algerian international hian a penalty pet hnuhnung pathum atang vawi hnih a khung tawh lo.
Minute nga hnu lekah City tan thil duhawm lo a thleng. Kum 22 mi Gomez chuan Copenhagen goal nawr tur dangin penalty area hmawrah team tana foul pawimawh a siam. Mahse ennawn leh a nih hnuah red card pek a ni a. Guardiola in Mahrez aiah Ruben Dias dahlutin a team a remthat a ngaih phah.
Second half-ah City inkhelh thin dan ang lo takin inkhel a muang. English club tan Joao Cancelo leh Kevin de Bruyne te erawhin goal khungna remchang an nei thova, amaherawhchu goal hmaah an tluan tling thin lo.
City coach Pep Guardiola chuan a team siksawi chungchang saiwin, “Vawiinah chawlh hahdam tir an tam a, hliam neuh neuh leh taksa chau avangte kan inchawlhtir. Southampton khelh zawhah Erling a chau a. Phil Foden pawhin harsatna neiin nimin lamah pawh Bernardo Silva a la chau hle.”
“Red card hmuh hnuah kan insiamrem tha hle. Kan dinhmun a tha tawh a, point hlu tak kan hmu.” a ti.
Inkhel dang
Group G inkhel lehlamah Borussia Dortmund leh Sevilla te 1-1 a an inhnehtawk avangin Man City hi an tling chiang tawh a. Dortmund erawhin an nghah a la ngai.
Westfalenstadion-ah Dortmund tan English midfielder Jude Bellingham chuan goal a khung a, hemi hma hian Sevilla in Tanguy Nianzou hmangin goal an khung.
Dortmund hian karleh a Man City an tum hunah tlin chian theihna hun an nei.