Aizawl : Health Minister leh South Tuipui bialtu MLA ni bawk Dr. R. Lalthangliana’n nimin khan Hnahthial District Treasury Office, Hnahthial Bazar veng a mi chu a hawng a, Zofa Run Lungleng veng, Hnahthialah hawnna inkhawm neih a ni.
Hawnna inkhawmah thu sawiin Dr. R. Lalthangliana hian, district a Treasury Office chu department zawng zawngte office intawm, a tel lo a awm thei miah loh, pisa pawimawh tak a ni a. Hnahthal District mipuite pawhin hun rei tak atangin an hawn hi an nghakhlelh a, tunah hawn a ni ta hi thil lawmawm leh chinchhiahtlak tak a nih thu a sawi.
Department tam tak thawktu indaihlo awm zingah Account & Treasuries Department pawh indaih lo tak nichungin he lai hmuna thawk tur an in dah thei hi a lawmawm tih sawiin, district-a Head of office chelhtu hrang hrangte hi Treasury office nen thawhhona tha tak nei a, inpawhna tha tak nei turin a chah.
Dr R Lalthangliana hian Hnahthial district, Khawzawl district leh Saitual district-te chu kum 2008-a sorkar tawp dawn a district capital-ah puan anih thu a sawi a. Kum 10 chhung Congress an sorkar khan hma an lak theih loh avangin, tun sorkar kal mek thla riat (8) chhung lekin tihhlawhtlin a ni ta tih a sawi.
South Tuipui bialtu MLA hian tun atanga rei loteah Hnahthialah District Fishery office leh DTO office pawh hawn theih a beisei thu a sawi a. Nakkum kum laihawl velah DC office thar leh CMO office sak mek pawh hawn theih a beisei thu a sawi bawk.