Congress party chuan nimin khan kum 2023 MLA General election atana an party manifesto pakhatna ‘Tang Puihna’ an zir ho.
Lal Thanzara, MPCC Vice President leh Chairman, Manifesto Drafting Committee kaihhruai inkhawmah hian C Chawngkunga chuan thu sawiin hun kal tawha sorkarin lo neitute tana ruahmanna a siam tawh thinte a hlawhchham thin dan leh a hlawhchham chhante sawiin, “Tihhlawhtlin ngei tur chauh manifesto kan nei tur a ni a, mipui kan bum tur a ni lo. Kan policy hi mipui tibeidawngtu a ni tur a ni lo,” a ti.
Lalrinmawia Ralte, Ex-Minister, Secretary, MPCC Manifesto Drafting Committee ni bawk chuan manifesto ‘Tang Puihna’’ sawi fiahna leh sawi zauna hun a hmang a. Zawhna leh chhanna hun zau taka hman a ni bawk.
Congress party hian an manifesto hrang hrangte hi a tahtawla tlangzarh zel an tum a ni.
Manifesto No. 1 tar lante
- Tang Puihna hnuaiah hian dinchhuah tum tak taka tan late hnenah tanpuina leh chhawmdawlna cheng nuai bi atanga hnathawktute mamawh intawm, eg: tuizem, kawng, tui lakna, godown, a sawngbawlna, etc a nih chuan vaibelchhe tel thlengin pek a ni ang.
- Kuthnathawktute tan thlai thar phurh chhuahna tur kawng tha siamsak an ni ang a, thlai chin tamna hmun bik siamin dah thatna tur, a hralhna tur leh a sawngbawlna thlengin siamsak an ni ang.
- Thlai chingtute leh a leitu turten indawrna rintlak tak, innghahna tlak an neih theih nan hmalak a ni ang. Thlai hralhna leh a kalphung engkim duanga viltu tur fel taka siam a ni ang a, hetiang a hman tur Dan pawh felfai taka siam a ni ang.
- Mahni a bul tan ngaihna hre lote training pein, kawng tha zawk siam sak an ni ang.
- Thalai, eizawnna nei mumal loten eizawnna tha zawk an neih theih nan nasa taka tan lak a ni ang a. An eizawnna tur atana pawimawh training buatsaih thin a ni ang. Sumdawnna bul tan duhte tan entrepreneurship development-ah uar taka hmalak a ni ang a, eizawnna kawnga pawimawh computer zirna leh tawng zirna changtlung taka kalpui a ni bawk ang.
- Mi vanduai bikte, rilru leh taksa lama harsatna neih vanga tan la ve thei tawh lote, dinhmun harsa lehzuala dingte enkawlna tur tha tak siam a ni ang a. Heng mi harsa zualte an dam loh nikhua a inenkawlna turte, ei leh in, chenna in leh zirna lam thlenga tanpuinate hei hian a huam ang.