AZL: MNF thalai hruaitu tharte chuan nimin khan Mizoram Journalists’ Association (MJA) pisa, Aizawl Press Club tlawhin MJA member-te nen inkawmhona hun tha tak an nei.
He hunah hian MNYF President L.Thangmawia, MLA chuan MJA-te nen inkawmhona hun tha tak an nei thei chu lawmawm a tih thu sawiin, mipui tana thuthar thehdarhtute thawhrimna leh inpekna chu chhuanawm a tih thu a sawi.
MNF hruaituten an chungah rinna nghata thalai kaihhruaina kawngah mawhphurhna an pek chu tha taka an hlen chhuah theih nan MJA member-te thawh hopuiah a sawm.
He hunah hian MJA Treasurer C. Lalhmachhuana pawhin thu sawiin MNYF Headquarters hruaitu tharten thuthar thehdarhtute hmalakna ngai pawimawha MJA pisa, Aizawl Press club an tlawh chu lawmawm a tih thu a sawi a. MJA member-te chuan mipuite hnena thuthar dik leh rintlak thehdarh hi an tih tur a nih avangin pawl tan bik neih a thiang lo a, mipui tana hriat tur tul leh pawimawh an neihte erawh inthlahrung loa puanzar hna rawn thawk zel turin MNYF hruaitute chu a sawm bawk.
MNYF President L.Thangmawia chuan MJA-ten a bungrua mamawh an leina atan Rs 50,000 chu MJA Treasurer kutah a hlan nghal a ni.